दसैंमा इनड्राइभका चालकलाई शून्य सेवाशुल्क सुविधा
काठमाडाैं, ७ असाेज । ग्लोबल मोबिलिटी तथा अर्बन सर्भिसेज प्लेटफर्म इनड्राइभले दसैंको अवसरमा काठमाडौंका चालक पार्टनरका लागि विशेष सुविधा घोषणा गरेको छ। पियर–टू–पियर (पीटुपी) मोडलमा सेवा प्रदान गर्ने इनड्राइभले यात्रु र चालक दुवैलाई स्वतन्त्र रूपमा भाडा निर्धारण गर्ने अवसर दिँदै आएको छ।
कम्पनीका अनुसार यात्रु र चालकबीच यात्रा सुरु हुनु अघि नै भाडाबारे आपसी सहमति हुने भएकाले दुवै पक्षका लागि उचित मूल्य तय हुन्छ। दसैंलाई लक्षित गर्दै इनड्राइभले राजधानीका चालक पार्टनरलाई शून्य प्रतिशत सेवाशुल्क लागू गर्ने घोषणा गरेको हो।
यस योजनाअन्तर्गत दसैं अवधिभर चालकहरूले कुनै सेवाशुल्क तिर्नुपर्ने छैन र यात्राबाट प्राप्त सम्पूर्ण आम्दानी उनीहरूले नै राख्न सक्नेछन्। इनड्राइभ नेपालकी कन्ट्री रिप्रिजेन्टेटिभ रीता पोखरेलले भनिन्, “हामी हाम्रो चालक पार्टनरलाई ठूलो समुदायको हिस्सा मान्छौं। दसैं अवसरमा उनीहरूलाई थप आम्दानी गर्न र यात्रुलाई सुरक्षित तथा निष्पक्ष सेवा दिन सहयोग पुग्ने उद्देश्यले शून्य प्रतिशत सेवाशुल्कको व्यवस्था गरिएको हो।”
इनड्राइभले यस्तो सुविधा मार्फत चालकलाई थप आम्दानीको अवसर प्रदान गर्नुका साथै यात्रुहरूलाई किफायती र पारदर्शी सेवा अनुभव दिलाउने अपेक्षा राखेको छ।
