युनिलिभर नेपालको लाभांश सुनिश्चित गर्न आज अन्तिम मौका

भोलि कात्तिक १० गते छठ पर्वको सार्वजनिक बिदा भएकाले आजसम्म नेप्सेमा कारोबार भइ कायम रहेका शेयरधनीहरूलाई मात्रै कम्पनीले वितरण गर्न लागेको लाभांश प्राप्त हुने अधिकार हुनेछ।

कम्पनीले आगामी कात्तिक २५ गते, मंगलबार, काठमाडौंको नयाँ बानेश्वरस्थित द एभरेष्ट होटल मा आफ्नो ३२औं वार्षिक साधारण सभा बोलाएको छ। सभा दिउँसो साढे ४ बजे शुरु हुनेछ।

सभामा प्रति शेयर १,८४२ रुपैयाँ नगद लाभांश वितरण गर्ने प्रस्ताव मुख्य एजेन्डा रहेको छ। त्यसका साथै नयाँ लेखापरीक्षक नियुक्त गर्ने, सामाजिक तथा सामुदायिक परियोजनामा आर्थिक योगदानको प्रस्ताव अनुमोदन गर्ने लगायतका विषयहरू पनि छलफलमा रहनेछन्।

युनिलिभर नेपाल, नेप्सेमा सूचीबद्ध सर्वाधिक लाभांश वितरण गर्ने कम्पनीहरूमध्ये एक मानिन्छ। लगानीकर्ताहरूका लागि कम्पनीको यो साधारण सभा महत्वपूर्ण हुने देखिन्छ, किनभने यसले आगामी वर्षको लाभांश नीति र कारोबारी योजनामा समेत संकेत दिनेछ।