४३ दिनपछि अमेरिकी सरकारी बन्द अन्त्य, ट्रम्पको हस्ताक्षरपछि सेवा पुनः सञ्चालन

काठमाडाैं, २७ कार्तिक । अमेरिकी इतिहासकै सबैभन्दा लामो सरकारी बन्द अन्त्य भएको छ। राष्ट्रपति डोनाल्ड ट्रम्पले सरकार सञ्चालनका लागि खर्च विधेयकमा हस्ताक्षर गरेसँगै ४३ दिनदेखि जारी सरकारी बन्द अन्ततः समाप्त भएको हो।

बुधबार राति प्रतिनिधिसभाले २२२–२०९ मतले पारित गरेको छोटो अवधिको खर्च विधेयकमा ट्रम्पले केही घण्टामै हस्ताक्षर गरेका थिए। सो विधेयक दुई दिनअघि सिनेटले सानो बहुमतका साथ पारित गरेको थियो।

हस्ताक्षरपछि ट्रम्पले भने, “सरकार अब सामान्य सञ्चालनमा फर्किनेछ। लामो बन्दका कारण धेरै मानिसहरू गम्भीर रूपमा प्रभावित भएका छन्।”

गत अक्टोबरदेखि सुरु भएको बन्दका कारण करिब १४ लाख संघीय कर्मचारीहरू तलबबिना काम गर्न वा अनिवार्य विदामा बस्न बाध्य भएका थिए। साथै, खाद्य सहायता सेवा रोकिएको, र हवाई यातायात देशभर अवरुद्ध भएको थियो, जसले लाखौं अमेरिकी नागरिकलाई प्रभावित पारेको थियो।

अब केही दिनभित्र सरकारी सेवा पुनः सञ्चालनमा आउने अपेक्षा गरिएको छ। तर, पारित विधेयकले जनवरी ३० सम्मका लागि मात्रै बजेट उपलब्ध गराउनेछ, त्यसपछि पुनः नयाँ खर्च विधेयक पारित गर्नुपर्नेछ।