सन् २०१८ मा ११ लाख पर्यटकले गरे नेपालको भ्रमण, गुणस्तरीय पर्यटक भित्र्याउन व्यवसायीको जोड

काठमाडौं, १७ पुस । सन् २०१८ मा नेपालमा पर्यटक आगमन उत्साहजनक रह्यो । नेपाल पर्यटन बोर्डको प्रारम्भिक तथ्यांक अनुसार यो वर्ष १० लाख ९६ हजार ४ सय ६६ जना पर्यटकले नेपाल भ्रमण गरेका छन् । यो संख्या हाल सम्मकै सबैभन्दा धेरै हो ।

सन् २०१७ मा लगभग साढे नौ लाख पर्यटकले नेपाल भ्रमण गरेका थिए । सरकारले २० लाख पर्यटक भित्र्याउने लक्ष्य सहित सन् २०११ मा नेपाल भ्रमण वर्ष मनाएको थियो । त्यसको ७ वर्षपछि यो लक्ष्य पुरा भएको हो ।

मुलुकमा निर्माण भएको राजनीतिक स्थीरतासँगै पुर्वाधारहरुको विकास भई सहज परिस्थिति सृजना भएको कारणले पनि पर्यटन आगमन वृद्धि हुदै गएको नेपाल पर्यटन बोर्डका प्रमुख कार्यकारी अधिकृत दिपकराज जोशीले बताए ।

सरकारले सन २०२० मा २० लाख पर्यटक भित्र्याउने लक्ष्य सहित नेपाल भ्रमण बर्ष मनाउने तयारी थालेको छ । सो लक्ष्य प्राप्तीका लागि सरकार, पर्यटन बोर्ड र नीजि क्षेत्र सहकार्य गर्दै विभिन्न योजना तथा कार्यक्रम निर्माणमा छन् । विभिन्न राष्ट्रिय तथा अन्तर्राष्ट्रिय विमान स्थलहरुको निमार्ण र स्तरोन्नती, पर्यटकिय गन्तव्यहरुको विस्तरसँगै सडक विस्तार गरिरहेको छ । पर्यटन बोर्डले १० हजार जना भन्दा बढीलाई तालिम र ५ सय भन्दा बढी अन्तर्राष्ट्रिय संचार माध्यमहरुमा नेपालको पर्यटन क्षेत्रको प्रचार–प्रसार गर्ने तयारी गरिहेको बोर्डका प्रमुख कार्यकारी अधिकृत जोशीले जानकारी दिए ।

हाल नेपालको पर्यटन क्षेत्रको कुल ग्राहस्थ उत्पादनमा ३ प्रतिशत योगदान रहेको छ भने ४ लाख भन्दा बढीलाई यो क्षेत्रले रोजगारीको अवसर प्रदान गरेको छ । सरकारले राखेको लक्ष्य पुरा भएमा कुल ग्राहस्थमा १० प्रतिशत योग्दान र ८ लाख भन्दा बढीलाई रोजगारीको अवसर सृजना गर्ने विश्वास लिइएको छ ।

ट्रेकिङ एजेन्सिज एसोसिएसन अफ नेपाल (टान) का अध्यक्ष नवराज दाहाल पनि सन् २०२० मा २० लाख पर्यटक भित्र्याउने सरकारी लक्ष्य पुरा हुने बताउछन् । तर सरकारले संख्या मात्र जोड दिनुभन्दा पनि गुणस्तरीय पर्यटक भित्र्याउन तिर ध्यानदिन आवश्यक रहेको उनले बताए । “संख्या मात्र हेरेर हुदैन पैसा खर्च गर्न सक्ने पर्यटक नेपाल आउनु प¥यो, उनले भने–अनि मात्र पर्यटक भित्रिएर देशको आर्थिक वृद्धिमा टेवा पुग्छ ।” सन् २०१८ मा नेपाल भित्रिएको पर्यटकहरुको संख्यालाई ऐतिहासिक मानिएको छ । तर यो तथ्यांकमा मात्र देखाइएको दाहालको भनाई छ । पर्यटकहरुको दोहोरो आगमान, गैरआवसिय नेपालीहरुको गणना तथा चीन र भारतबाट व्यवसायीक तथा नीजि प्रयोजनका लागि नेपाल आएकाहरुलाई पनि गणना गरि संख्यामा वृद्धि गरिएको उनले बताए ।

त्यस्तै होटल संघ नेपाल (हान) का महासचिव विनायक शाह भने पर्यटन क्षेत्रको विकासको मुख्य समस्या नै विमानस्थल भएको बताउछन् । सरकारले विमानस्थलका लागि बजेट छुट्टयाउनुका साथै विभिन्न अन्तर्राष्ट्रिय दातृ निकायहरुले ठुलो रकम सहयोग गरेको भए पनि खर्च गर्न नसक्दा पूर्वाधार निर्माणमा पछि परेको उनको तर्क छ । सरकारले पर्यटकको संख्या वृद्धिमा मात्र ध्यान दिनु भन्दा पनि काम गर्ने शैलीमा परिवर्तन र तीव्रता दिन आवश्यक रहेको महासचिव शाहको भनाई छ ।

नेपालको होटल क्षेत्रले आजको दिनमा नै २५ लाख पर्यटकलाई सम्पुर्ण सुविधा दिन सक्षम रहेको
शाहले बताए । “पर्यटनको संख्यामा वृद्धि भएमा हामी धेरै खुसी हुन्छौ तर सरकारले झोले पर्यटक मात्र भित्र्याएर त केही फाईदा भएन नि , महासचिव शाहले भने–त्यसैले लक्ष्य पुरा गर्दा सरकारले संख्यात्मक भन्दा पनि गुणात्मक पर्यटक भित्र्याउन तर्फ ध्यान दिन पर्छ ।”