लुक्लामा भएको विमान दुर्घटनाको छानविन गर्न समिति गठन
काठमाडौं, २ बैशाख । सोलुखुम्बुको लुक्ला स्थित तेञ्जिङ हिलारी विमानस्थलमा आइतबार बिहान भएको समिट एयरको विमान दुर्घटनाको बारेमा छानबिन गर्न सरकारले समिति गठन गरेको छ । संस्कृति, पर्यटन तथा नागरिक उड्डयन मन्त्रालयले नेपाल नागरिक उड्डयन प्राधिकरण (क्यान) का पूर्वमहानिर्देशक राजेशराज दलीको अध्यक्षतामा छानबिन समिति गठन गरेको हो ।
समितिमा नेपाल वायुसेवा निगमका इन्जिनियर राजेश श्रेष्ठ र सिता एयरका पाइलट रबिन्द्र डङ्गोल सदस्य रहेका छन् । समितिको सदस्य सचिवमा पर्यटन मन्त्रालयका सहसचिव बुद्धिसागर लामिछाने छन् ।
लुक्लाबाट रामेछाप उड्ने क्रममा ‘नाइन एन एएमएच’ कलसाइन विमान धावनमार्गबाट चिप्लिएर पार्किङ गरी राखिएको श्री एयर र मनाङ एयरको ‘नाइनएन एएलसी’ कल साइन हेलिकप्टरसँग ठोक्किदा तीन जनाको निधन भएको थियो ।
