२५ वर्षे दीर्घकालिन योजना निर्माण गर्दै धनगढी उप–महानगरपालिका, सरोकारवालाहरुसँग सुझाव संकलन गरिदै
बिवेक नगरि
धनगढी, ९ जेठ । २५ वर्षे दीर्घकालिन शहरी विकास योजना निर्माण गरिरहेको धनगढी उप–महानगरपालिकाले सरोकारवलाहरुसँग सुझाव संकलन सुरु गरेको छ । योजनालाई अझ प्रभावकारी र सबै नागरिकले अपनत्व ग्रहण गर्ने बनाउन उप–महानगरपालिकाले पूर्व नगरप्रमुखहरु, नागरिक समाजका प्रतिनिधि, जनप्रतिनिधि सहित स्थानीयहरुसँग सुझाव संकलन गरेको हो ।
धनगढी उप–महानगरपालिकाका प्रमुख नृपबहादुर वडले बिगत र अहिलेको अबस्थालाई बिश्लेषण गरेर दीर्घकालिन शहरी विकास योजना निर्माण गर्न लागेको जानकारी दिए । अहिले बनाउने दीर्घकालिन योजनासँग धनगढी शहर र नगरबासीको भविष्य जोडिएको भन्दै उनले मस्यौदामा छुटेका कुराहरुमा सुझाव दिन सबै नगरबासीलाई आग्रह गरे ।
धनगढीलाई ब्यबस्थीत, सुन्दर र समुन्नत शहर बनाउनका लागि सरोकारवलाहरुलाई बिभिन्न समुहमा बिभाजन गरेर सुझाव संकलन गर्ने काम भइरहेको उप–महानगरपालिकाका पूर्व नगरप्रमुख खेमराज पाण्डेले बताए । उनले अहिले बनाएको योजनाले दीर्घकालिन असर पार्ने भएकाले पूर्वाग्रह त्यागेर सुझाव दिनुपर्ने बताए । नगर भित्र नगरबसपार्क, खुल्ला क्षेत्र, पार्क, आकाशेपुल क्षेत्र,एकिकृत फोहर ब्यबस्थापन केन्द्र, तरकारी बजार, मनोरञ्जन स्थल, कवडहल, पार्किङ्ग क्षेत्र, बिमानस्थल, पर्यटक सूचना केन्द्र लगायतका क्षेत्रहरु समेत छुट्याईने छ ।
क्षेत्रीय शहरी विकास आयोजना कार्यालय धनगढीका आयोजना प्रमुख सुरेश बाग्लेले धनगढी नगरका समस्या, चुनौती र सम्भावनाहरुको बिश्लोषण गरेर दीर्घकालिन शहरी विकास योजना निर्माण भइरहेको बताए । यो सुदूरपश्चिम प्रदेशको एक मात्रै उप–महानगरपालिका हो । धनगढी निकट महानगरपालिकामा परिक्षण हुने पक्का जस्तै भएकाले पनि त्यो सोच राखेर योजना तयार गरिनुपर्ने सुझाव सहभागिहरुले दिएका छन् ।
