२१ म्यानपावरले मात्रै बढाए धरौटी, तोकिएको समयमा धरौटी नबढाए कम्पनी खारेजी गरिने
काठमाडौ ८ भदौ । सरकारले आगामी भदौ १७ गतेसम्म सबै म्यानपावर कम्पनीलाई धरौटी रकम बढाउँन निर्देशन दिए पनि हासम्म २१ वटा कम्पनीले मात्रै रकम बढाएका छन् । बैदेशिक रोजगार विभागका अनुसार गत विहिबारसम्ममा २१ वटा म्यानपावर कम्पनीले नगद धरौटी र बैक ग्योरेण्टी बढाएका छन् । ५० वटा कम्पनीले भने बैक ग्यारेण्टी मात्रै बढाएका छन् । कम्पनीहरुले आगामी भदौ १७ सम्ममा धरौटी रकम बढाउँनु पर्नेछ ।
विभागका अनुसार हाल नेपालमा १ हजार १४५ म्यानपावर कम्पनी सक्रिय छन् । तर, विभागबाट सञ्चालन अनुमती लिनेको संख्या भने १ हजार ५ सय २७ छ । यसमध्ये २ सय १० कम्पनी खारेज भएका छन । ९० कम्पनीको कारोबार रोक्का गरिएको छ । त्यस्तै, ८२ कम्पनी निष्क्रिय छन ।
संस्थागत रूपमा वैदेशिक रोजगारीमा जाने कामदार ठगिने क्रम बढ्न थालेपछि सरकारले ऐन परिवर्तन गर्दै म्यानपावर कम्पनीको धरौटी रकम बढाएको हो । सरकारले श्रेणीअनुसार बैंक ग्यारेन्टी र नगद धरौटी बुझाउनुपर्ने व्यवस्था गरेको छ । संशोधित ऐनअनुसार एक वर्षमा ३ हजारभन्दा कम कामदार पठाउने म्यानपावर कम्पनीले ५० लाख नगद धरौटी र १ करोड ५० लाख रुपैयाँ बैंक ग्यारेण्टी राख्नुपर्नेछ । ३ देखि ५ हजारसम्म कामदार पठाउनेले १ करोड रुपैयाँ नगद धरौटी र २ करोड बैंक ग्यारेन्टी राख्नुपर्नेछ । ५ हजारभन्दा बढी कामदार पठाउनेले २ करोड रुपैयाँ नगद धरौटी र ३ करोड रुपैयाँ बैंक ग्यारेण्टी अनिवार्य रूपमा राख्नुपर्ने व्यवस्था गरिएको छ । यसअघि म्यानपावर कम्पनीले ७ लाख रुपैयाँ मात्र नगद धरौटी र २३ लाख रुपैयाँ बैंक धरौटी राख्नुपर्ने व्यवस्था थियो ।
