मर्जिन लेन्डिङ अन्तिम चरणमा, केही साताभित्रै ब्रोकरबाटै सेयर कर्जा पाईने
काठमाडौ २१ भदौ । आगामी केही साता भित्रै सेयर ब्रोकरले “मार्जिन लेन्डिङ” को कार्य सुर गर्ने भएका छन् । यसका लागि सम्बन्धित सबै निकायले अन्तिम तयारी पुरा गरेको बताएका छन् ।
नेपाल धितोपत्र बोर्डले धेरै समय अघि नै सेयर ब्रोकरले “मार्जिन लेन्डिङ” को व्यवस्था गरेको थियो । तर, सिडिएस एन्ड क्लियरिङ लिमिटेड (सिडिएससी) ले कारोबार राफसाफ सम्बन्धी व्यवस्था गर्न नसक्दा कार्यन्वयन भने हुन सकेको थिएन । सिडिएससीले आफनो विनियमावलीमा संशोधन गरी लामो समय देखि अल्झिएको कार्यलाई पूर्णता दिने भएको छ ।
सिडिएससीले गरेको नयाँ व्यवस्था अनुसार अब देखि लगानीकर्ताले मार्जिन कारोबार अन्तर्गत खरिद गरेको धितोपत्र जम्मा हुने गरी छुट्टै हितग्राही खाताको व्यवस्था गरेको छ । योसँगै मार्जिन लेन्डिङको बाटो खुलेको छ ।
सेयर ब्रोकरले सेयर लगानीकर्तालाई सेयर खरिदका लागि दिने कर्जालाई ‘मार्जिन कर्जा’ भनिन्छ । यस्तो खालको कर्जा लिनका लागि लगानीकर्ताले आफूले लगानी गर्न चाहेको रकमको ५० प्रतिशत रकम जम्मा गर्नुपर्छ । बाँकी ५० प्रतिशत रकम ब्रोकरले ऋण प्रदान गर्छन् । तर, सबै ब्रोकर कर्जा प्रवाह गर्न पाउँदैनन् । कर्जा प्रवाह गर्नका लागि ब्रोकर कम्पनीको चुक्ता पुँजी कम्तीमा ५ करोड रुपैयाँ भएको हुनुपर्छ । यस्ता कम्पनीले बैंकसँग ऋण ल्याएर र आफ्नो स्वपुँजीबाट कुल नेटवर्थ (सम्पत्ति) को दुई गुणासम्म मात्र ग्राहकलाई कर्जा दिन सक्नेछन् । यसका लागि नेप्से र राष्ट्र बैंकबाट २१ ब्रोकरमध्ये १४ वटाले अनुमति पाइसकेका छन । ७ ब्रोकर कम्पनी प्रक्रियामा छन ।
