निर्जीवन बीमा कम्पनीले गरे असोज महिनामा साढे दुई अर्बको व्यवसाय
काठमाडौं, ११ मंसिर । चालु आर्थिक बर्षको असोज महिनामा निर्जीवन बीमा कम्पनीहरुले २ अर्ब ३६ करोड रुपैयाँ बराबरको बीमा शुल्क आर्जन गरेका छन् । गत भदौ महिनासम्ममा भने कम्पनीहरुले ४ अर्ब ६५ करोड रुपैयाँ बराबरको बीमाशुल्क आर्जन गरेका थिए ।
निर्जीबन बीमा कम्पनीहरुले गरेको बीमा व्यवसायमध्ये मोटर बीमाको हिस्सा अधिक छ । मोटर बीमालाई सरकारले अनिवार्य गरेपछि यस्तो बीमाको हिस्सा अधिक भएको हो । बीमा समितिको तथ्यांक अनुसार असोज महिना कम्पनीहरुले मोटर बीमा बापत १ अर्ब २२ करोड रुपैयाँ बीमा शुल्क संकलन गरेका छन् । त्यस्तै, अग्नि बीमा बापत मात्रै ४१ करोड ७४ लाख रुपैयाँ बीमाशुल्क संकलन गरेका छन् । सामुन्द्रिक बीमा बापत ९ करोड ८६ लाख, हवाई बीमा बापत १ करोड ७८ लाख, इन्जिनियरिगं बीमा बापत २१ करोड ७ लाख र अन्य बीमा बापत भने कम्पनीहरुले १९ करोड ९५ लाख रुपैयाँ बीमाशुल्क संकलन गरेका छन् । त्यस्तै कम्पनीहरुले कृषि तथा बाली बीमा बापत १९ करोड ५४ लाख रुपैयाँ बीमा शुल्क संकलन गरेका छन् ।
त्यस्तै सो अवधिमा कम्पनीहरुमा ३८ अभिकर्ता थपिएर हालसम्म ४ हजार २० जना पुगेका छन् । कम्पनीहरुले पुनर्बीमा शुल्क बापत ८५ करोड २ लाख रुपैयाँ भुक्तानी गरेका छन् भने पुनर्बीमा बापत ३० करोड ४८ लाख रुपैयाँ कमिशन पाएका छन् । पुनर्बीमा बापत कम्पनीहरुले भने ३८ करोड २३ लाख रुपैयाँ दायित्व व्यहोरेका छन् ।
असोज महिनामा कम्पनीहरुमा ८ हजार ३ सय ४९ वटा दाबी परेको छ भने कम्पनीहरुले ६ हजार ८ सय ५० वटा दाबीको भुक्तानी गरिसकेका छन् । तर, अझै कम्पनीहरुले भुक्तानी गर्न बाँकी रहेको दाबीको संख्या भने २ हजार ४ सय ३६ रहेको छ ।
