९२ हजार मेट्रिकटन चामल, ४९ हजार किलोलिटर पेट्रोलियम पदार्थ मौज्दात

काठमाडौं, ८ जेठ । लकडाउनका कारण आयात तथा आपूर्तिमा केही असहज भए पनि तत्कालका लागि खाद्यान्न, पेट्रोलियम पदार्थ लगायतको मौज्दात भने पर्याप्त रहेको पाइएको छ । हाल खाद्य व्यवस्था तथा व्यापार कम्पनी लिमिटेड र निजीक्षेत्रसँग गरी ९१ हजार ५०४ मेट्रिक टन चामलको मौज्दात रहेको उद्योग, वाणिज्य तथा आपूर्ति मन्त्रालयले बताएको छ ।
मन्त्रालयले बुधवार सार्वजनिक गरेको तथ्यांक अनुसार खाद्य व्यवस्था तथा व्यापार कम्पनीसँग १६ हजार ५०४ र निजीक्षेत्रका उद्योगसँग ७५ हजार मेट्रिक टन गरी दुई निकायसँग ९१ हजार ५०४ मेट्रिक टन चामल मौज्दात रहेको हो ।
मन्त्रालयका सहप्रवक्ता उर्मिला केसीका अनुसार कम्पनीसँग दुर्गमका २३ जिल्लामा दुई हजार ८४३ मेट्रिक टन चामल, ६६४ क्विन्टल फापर, ५२४ क्विन्टल सिमी, ५५७ मेट्रिक टन गहुँ र १८ मेट्रिक टन दाल तथा गेडागुडी मौज्दात छ । त्यसैगरी साल्ट ट्रेडिङ कर्पोरेशन लिमिटेडसँग दुर्गमका जिल्लामा दुई हजार ८२५ मेट्रिक टन नून गरी एक लाख ३७ हजार ९६६ मेट्रिक टन मौज्दात छ ।
मन्त्रालयको तथ्यांकानुसार साल्ट ट्रेडिङसँग दुई हजार २६३ चिनी र निजी क्षेत्रसँग ६३ हजार २०७ गरी ६५ हजार ४७४ चिनी मौज्दात छ । यसैगरी निजी क्षेत्रका व्यापारीसँग दाल तथा गेडागुडी १६ हजार ८१ मेट्रिक टन मौज्दात छ भने ८३ हजार ९६७ मेट्रिक टन खाने तेल आयात प्रक्रियामा रहेको जनाइएको छ ।
यस्तै मन्त्रालयले सार्वजनिक गरेको तथ्यांकानुसार ४८ हजार ९०० किलोलिटर पेट्रोलियम पदार्थको मौज्दात छ, जसअनुसार निगमसँग हाल ३३ हजार १७४ किलोलिटर डिजेल, ६ हजार ५५० किलोलिटर पेट्रोल, २ हजार १४२ किलोलिटर मट्टीतेल, सात हजार ३४ किलोलिटर हवाई इन्धन मौज्दात छ । लकडाउनका कारण पेट्रोलियम पदार्थको खपतमा कमी आएपछि नेपाल आयल निगमले भण्डारणबाट निश्चित मात्रामा तेल घटेकाले इण्डियन आयल कर्पोरेशनलाई अनुरोध गरेर पाइपलाइन सञ्चालन गर्दै आएको छ । लकडाउनअघि दैनिक सञ्चालन भएको पाइलपाइन हाल आवश्यकतानुसार सञ्चालन गरिँदै आएको छ । त्यस्तै विभिन्न एलपी ग्यास उद्योगसँग ११ मेट्रिक टन ग्यास मौज्दात रहेको बताइएको छ ।