नागरिक उड्डयन प्राधिकरणको बजेट रू. ४१ अर्ब ११ करोड, निर्माणाधीन अन्तरराष्ट्रिय विमानस्थललाई प्राथमिकता

काठमाडौं, २४ साउन । नेपाल नागरिक उड्डयन प्राधिकरण (क्यान)ले चालू आर्थिक वर्ष २०७७÷७८ को बजेट सार्वजनिक गरेको छ । क्यानले शुक्रवार चालू आवका लागि रू. ४१ अर्ब ११ करोड ३ लाख बजेट विनियोजन गरेको हो । प्राधिकरणले सार्वजनिक गरेको चालू आवको बजेट तथा नीति कार्यक्रममा निर्माणाधीन अन्तरराष्ट्रिय विमानस्थललाई प्राथमिकता दिएको छ । प्राधिकरणले अघिल्लो आर्थिक वर्ष २०७६÷७७ का लागि रू. ४६ अर्ब ९६ करोड ५० लाखको बजेट ल्याएको थियो । कोभिड–१९ का कारण विमानस्थलको आय घटेकाले चालू आवका लागि अघिल्लो वर्षको तुलनामा केही कम बजेट विनियोजन गरिएको हो ।
प्राधिकरणका महानिर्देशक राजन पोखरेलले यस पटकको बजेटमा नयाँ कार्यक्रम नभई निर्माणाधीन अन्तरराष्ट्रिय विमानस्थललाई प्राथमिकतामा राखेर बजेट विनियोजन गरिएको बताएको राससमा उल्लेख छ । प्राधिकरणले संस्थागत सुधार, विमानस्थल विकास तथा स्तरोन्ति, सञ्चार उपकरण, सुरक्षा उपकरण तथा मौसमी उपकरण जडान, अन्तरराष्ट्रिय विमानस्थल विस्तार र जनशक्तिलाई प्राथमिकतामा राखेर बजेट सार्वजनिक गरेको छ ।
विमानस्थल पूर्वाधारतर्फ प्राधिकरणले गौतमबुद्ध अन्तरराष्ट्रिय विमानस्थल सञ्चालनमा ल्याउने र पोखरा क्षेत्रीय अन्तरराष्ट्रिय विमानस्थको निर्माण सम्पन्न गर्ने लक्ष्य लिएको छ । गौतमबुद्ध विमानस्थलको लािग अधिग्रहण गरिएको जग्गाको मुआब्जाका लागि प्राधिकरणले रू.२ अर्ब १६ करोड ८३ लाख विनियोजन गरेको छ । त्यस्तै पोखरा विमानस्थलको लागि गरिएको जग्गा अधिग्रहणलाई रू.७८ करोड विनियोजन गरिएको छ ।
निजगढ अन्तरराष्ट्रिय विमानस्थल निर्माणको लागि अधिग्रहण गरिएको जग्गाको मुआब्जा वितरणलाई रू.२० करोड व्यवस्था गरिएको छ । यो विमानस्थलको गुरुयोजना तयार गर्ने बताइएको छ । यसैगरी गौतमबुद्ध अन्तरराष्ट्रिय विमानस्थललाई अन्तरराष्ट्रिय विमानस्थलका रुपमा प्रमाणित गर्ने, अन्तरप्रदेश उडानमा प्रोत्साहन दिने, आइटी नीति तयार गर्ने, त्रिभुवन अन्तरराष्ट्रिय विमानस्थललाई २४ घण्टा नै सञ्चालन योग्य बनाउने प्राधिकरणको योजना छ ।