चालु आवको चार महिनामा वस्तु आयातमा १०.६२ प्रतिशतले कमी, निर्यात भने बढ्यो

काठमाडौं, ९ मंसिर । चालु आर्थिक वर्ष २०७७÷७८ को पहिलो चार महिनामा वस्तु आयतमा कमी आएको छ । गत वर्षको तुलनामा चालु आर्थिक वर्षको चार महिनामा वस्तु आयातमा १०.६२ प्रशितले कमी आएको हो । भन्सार विभागले सार्वजनिक गरेको तथ्यांक अनुसार साउनदेखि कात्तिकसम्म ४ खर्ब २ अर्ब ४९ करोड रुपैयाँ बराबरको वस्तु आयात भएको छ ।

यस अवधिमा निर्यातमा भने वृद्धि भएको छ । चालु आर्थिक वर्षको चार महिनामा ४० अर्ब २० करोड रुपैयाँको वस्तु निर्यात भएको छ । यो गत आवको यसै अवधिको तुलनामा १०.८१ प्रतिशतले बढी हो ।

विभागको तथ्यांकअनुसार चार महिनामा नेपालको कुल व्यापार घाटा ३ खर्ब ६२ अर्ब २९ करोड रुपैयाँ बराबरको भएको छ । यो अघिल्लो आवको यसै अवधिको तुलनामा १२.४९ प्रतिशतले कमी हो । गत वर्षको सोही अवधिमा ४ खर्ब १४ अर्ब रुपैयाँ बराबरको व्यापार घाटा रहेको थियो ।