नेपाल टेलिकमको आइपी टिभी शुक्रवारदेखि सञ्चालन हुँदै, ७७ वटै जिल्लामा विस्तार गर्ने

काठमाडौं, १६ पुस । नेपाल टेलिकमले काठमाडौं उपत्यकामा भोलि (शुक्रवार)देखि आइपी टिभी सञ्चालनमा ल्याउने भएको छ । दुई वर्षदेखि तयारी गरेको टेलिकमले पुस १७ गतेदेखि एनटी टिभी ब्रान्डमा फाइबर टु दी होम (एफटिटिएच)मार्फत आइपी टिभी सेवा सञ्चालनमा ल्याउन लागेको हो ।
हाल टेलिकमले एफटिटिएच सेवाबाट भ्वाइस सेवा र डाटा सेवा उपलब्ध गराइरहेकामा अब आइपी टिभी सेवा थप गर्न लागेको हो । कम्पनीको एनटी टिभी सेवाका लागि एफटिटिएच नेटवर्कको पहुँच भने अपरिहार्य हुनेछ । तत्कालका लागि उक्त सेवा काठमाडौँ उपत्यकाभित्र सुन्धारा, बबरमहल, ठिमी, बलम्बु, भक्तपुर, चाबहिल, छाउनी र गोङ्गबुमा उपलब्ध हुनेछ ।
यसैगरी पाटन, हात्तीगौंडा, जोरपाटी, कीर्तिपुर, सैंबु, लुभू, नक्साल तथा उपत्यकाबाहिर बनेपामा समेत टेलिकमको एफटिटिएच नेटवर्क पुगिसकेको र प्राविधिक रुपमा एफटिटिएच वितरण गर्न सकिने स्थानहरुमा उपलब्ध हुने बताइएको छ । साथै ७७ वटै जिल्लामा विस्तार गर्दै जाने योजना टेलिकमको छ ।
हाल एफटिटिएच सेवामार्फत भ्वाइस तथा डाटा सेवा वा दुवै सेवा लिइरहेका ग्राहकहरुले एनटी टिभी सेवा प्राप्त गर्न नजीकैको नेपाल टेलिकमको कार्यालयमा सम्पर्क गर्नुपर्ने टेलिकमका प्रवक्ता राजेश जोशीले बताएका छन् । उनका अनुसार उक्त टिभी सेवा ग्रयोग गर्न ग्राहकले कम्पनीबाट सेटअप बक्स खरीद गर्नुपर्दछ भने हाल प्रयोगमा रहेको पुरानो तथा आधुनिक (नयाँ) टिभी सेटमा एनटी टिभी हेर्न सकिनेछ ।
विभिन्न राष्ट्रिय टिभी च्यानल तथा विदेशी च्यानलहरु उपलब्ध हुने एनटी टिभी सेवा विभिन्न प्याकेजमा वितरण हुने भन्दै आवश्यकता र उपयुक्तताअनुसार छनोट गर्न सकिने टेलिकमले बताएको छ ।
नेपाल दूरसञ्चार प्राधिकरणले कात्तिकमा सार्वजनिक गरेको भदौसम्मको तथ्यांक अनुसार टेलिकमका एफटीटीएच ग्राहक देशैभर दुई लाख ४३ हजार २१४ रहेका छन् । टेलिकमले ७३ जिल्लामा पु¥याएको यस्तो द्रुत गतिको इन्टरनेट सेवालाई छिट्टै ७७ जिल्लामा पु¥याइने योजना रहेको पपि टेलिकमले बताएको छ ।