आमहड्तालले देशभरको जनजीवन प्रभावित, निर्धक्क पेशा व्यवसाय सञ्चालन गर्न गृहको आग्रह
काठमाडौं, २२ माघ । नेपाल कम्युनिष्ट पार्टी (प्रचण्ड–माधव समूह)ले आह्वान गरेको आमहड्तालले आज देशभरको जनजीवन प्रभावित भएको छ । नेपाल प्रहरीका अनुसार देशभर सवारी सञ्चालन साविकभन्दा न्यून छ । यस्तै अत्यावश्यक प्रयोजनका बाहेक अन्य सेवा तथा पेशा व्यवसाय प्रभावित हुँदा सर्वसाधारणले सास्ती पाएका छन् ।
आमहड्तालको प्रभाव काठमाडौं उपत्यकामा तुलनात्मक रूपमा कम भए पनि उपत्यका बाहिर बढी प्रभाव परेको बताइएको छ । बन्दकर्ताले काठमाडौंसहित केही स्थानमा सञ्चालित सवारीसाधनमा समेत क्षति पु¥याएका छन् ।
सरकारको सिफारिसमा राष्ट्रपति विद्यादेवी भण्डारीले बुधवार अख्तियार दुरुपयोग अनुसन्धान आयोग, निर्वाचन आयोगलगायतका संवैधानिक निकायमा नियुक्ति गरेको विरोधमा प्रचण्ड–माधव समूहले आज आमहडताल आह्वान गरेको हो ।
सरकारले भने पूर्ववत् रूपमै सार्वजनिक यातायात, उद्योगधन्दा, पेशा, व्यवसाय सञ्चालन गर्न उद्यमी व्यवसायीलाई आग्रह गरेको छ । गृह मन्त्रालयले विज्ञप्ति जारी गर्दै आमहड्तालका क्रममा संविधान तथा प्रचलित कानूनविपरीत शान्ति सुरक्षामा खलल पुग्ने गतिविधि नगर्न भनेको छ । साथै शान्ति सुरक्षामा खलल पुग्नेगरी तोडफोड, आगजनी र जबर्जस्तीलगायतका अवाञ्छित गतिविधि गरेको पाइएमा त्यस्ता गतिविधिमा संलग्न हुने उपर कानूनबमोजिम कारबाही गरिने चेतावनी दिएको छ ।
