निजी तथा साझेदारी फर्म दर्ता जिल्लाबाटै, पहिलो चरणमा बागमती प्रदेशमा
काठमाडौं, २२ माघ । वाणिज्य, आपूर्ति तथा उपभोक्ता हित संरक्षण विभागले निजी र साझेदारी फर्म दर्ता जिल्लाबाटै हुने व्यवस्था गर्ने भएको छ । पहिलो चरणमा बागमती प्रदेशमा जिम्मेवारी हस्तान्तरण गरेको विभागले निकासी, पैठारी व्यापार बाहेकका प्राइभेट तथा साझेदारी फर्म दर्ता र नियमनको कार्य अन्य प्रदेशमा समेत प्रदेश कानून तर्जुमा भएपपछि क्रमशः हस्तान्तरण गरिने बताएको छ ।
पहिलो चरणमा बागमती प्रदेशभित्रका जिल्लाबाट आगामी फागुन १ गतेदेखि यो सेवा सञ्चालन हुनेछ । विभागले बागमती प्रदेश, उद्योग, पर्यटन, वन तथा वातावारण मन्त्रालय अन्तर्गतका जिल्लास्थित घरेलु तथा साना उद्योग कार्यालय हुने बताएको छ ।
जिल्लास्थित घरेलु तथा साना उद्योग कार्यालयबाट निकासी पैठारी व्यापारबाहेकका प्राइभेट तथा साझेदारी फर्म दर्ता तथा नियमनको कार्य हुने विभागका प्रवक्ता शिवराज सेढाईंलाई उद्धृत गर्दै राससले उल्लेख गरेको छ ।
पुराना फर्मको नवीकरण, संशोधन र खारेजीसम्बन्धी कार्य भने सम्बन्धित प्रदेशमा हस्तान्तरण नभएसम्म विभागबाटै सञ्चालन हुनेछ ।
गत १७ गते मन्त्रिस्तरीय निर्णयबाट ‘वाणिज्य प्रशासनसम्बन्धी कार्य जिम्मेवारी हस्तान्तरण अवधारणापत्र तथा कार्ययोजना, २०७७’ को स्वीकृत भएको थियो ।
