लगातार घटेको बजार साताको अन्तिम दिन दोहोरो अंकले बढेर बन्द
काठमाडौं, २४ असार । साताको अन्तिम कारोबार दिन बिहीबार नेपाल स्टक एक्सचेञ्ज (नेप्से) परिसूचक दोहोरो अंकले वृद्धि भएर बन्द भएको छ । लगातार ओरालो लागेको बजार आज भने २३.७६ अंक वृद्धि भएर २८२४ विन्दुमा रोकिएको हो । सेन्सेटिभ इन्डेक्स पनि ४.४१ अंकले वृद्धि भएर ५२९.६६ विन्दुमा पुगेको छ ।
आज २२३ कम्पनीको १ करोड ३१ लाख ४३ हजार कित्ता शेयर ४ अर्ब ८१ करोड ५५ लाख रुपैयाँमा खरिद बिक्री भएको छ ।
आज कारोबारमा आएका १३ समूहमध्ये उद्योग र अन्य समूहको परिसूचक घटेको छ भने बाँकी समूहको परिसूचक वृद्धि भएको छ । उद्योग समूहको परिसूचक ०.५५ प्रतिशतले र अन्य समूहको पनि ०.५५ अंकले नै घटेको छ । सर्वाधिक परिसूचक वृद्धि फाइनान्स समूहको भएको छ ।
आज गुहेश्वरी मर्चेन्ट बैंक तथा फाइनान्सको शेयर मूल्य सर्वाधिक बढेको छ । यो कम्पनीको शेयर मूल्य ९.४७ प्रतिशतले वृद्धि भएर ४७४ रुपैयाँ कायम भएको छ ।
बढेको बजारमा नेपाल बैंक लिमिटेडको सर्वाधिक मूल्यको शेयर खरिद विक्री भएको छ । यो कम्पनीको २१ करोड ५२ लाख ९१ हजारको शेयर खरिद विक्री भएको छ । नेपाल बैंकको शेयर मूल्य ४३८ रुपैयाँ कायम भएको छ ।
