नेप्से परिसूचक हालसम्मकै उच्च विन्दुमा, १४ अर्ब बढीको शेयर कारोबार
काठमाडौं, १० साउन । साताको पहिलो कारोबार दिन आइतबार (आज) नेप्से परिसूचकले नयाँ रेकर्ड कायम गरेको छ । यस अघि साउन ४ गते ३०३२ विन्दुसम्म पुगेर घटेको बजारले आज भने नयाँ रेकर्ड कायम गरेको छ । त्यसअघि जेठ ३१ गते २०२५ विन्दुमा पुगेको थियो भने आज परिसूचक ३०५८.६४ विन्दुमा रोकिएको छ। आज नेप्से परिसूचक ५४.३१ अंकले वृद्धि भएको छ ।
आज २२३ कम्पनीको ४ करोड ४१ लाख १४ हजार भन्दा बढी कित्ता शेयर १४ अर्ब २३ करोड रुपैयाँमा खरिद विक्री भएको छ ।
आज ९ वटा कम्पनीको शेयर मूल्य १० प्रतिशतले वृद्धि भएको छ । जसमध्ये ७ वटा हाइड्रोपावर कम्पनी रहेका छन् । आज बैंकिङ समूहको परिसूचक वृद्धि भएको । बैंकिङ समूहको परिसूचक ३.४३ प्रतिशतले वृद्धि भएको छ ।
आज कारोबारमा आएका १३ समूहमध्ये दुई वटा समूहको परिसूचकमा कमी आएको छ भने बाँकी समूहको परिसूचकमा वृद्धि भएको छ । परिसूचक घट्नेमा होटल तथा पर्यटन समूह ०.६२ प्रतिशत र म्युचुअल फण्ड समूह १.२९ प्रतिशत रहेका छन् ।
