कोरोना बीमाको दाबी भुक्तानीको ढिलाइले बीमाबारे नकारात्मक सन्देश जाने चिन्ता
काठमाडौं, २५ साउन । नेपाल बीमक संघका महासचिव चंकी क्षेत्रीले कोरोना बीमाको दाबी भुक्तानी रोक्दा बीमा क्षेत्रबारे नकारात्मक सन्देश जाने भन्दै सरकारलाई आफ्नो दायित्व अन्तर्गतको रकम तत्काल निकासा गरिदिन आग्रह गरेका छन् । सरकारले आफ्नो दायित्व बापतको झन्डै १० अर्ब रुपैयाँ निकासा नगरिदिँदा साउन १ देखि कोरोना बीमाको दाबी भुक्तानी कम्पनीहरूले रोकेका छन् ।
महासचिव क्षेत्रीका अनुसार कोरोना बीमामा कुल १ अर्ब ५ करोड ५ लाख रुपैयाँ बीमा शुल्क संकलन भएको छ भने दाबी १३ अर्ब १४ करोड १७ लाख रुपैयाँभन्दा बढीको परेको छ । त्यसमध्ये हालसम्म करिब ५ अर्बको हाराहारीमा दाबी भुक्तानी भएको छ । अब कम्पनीहरूलाई कोरोना बीमाको भुक्तानीका लागि पैसा व्यवस्थापन गर्न समस्या भएकाले सरकारले दिने रकम नआईकन बीमितलाई दिन सक्ने अवस्था नरहेको उनले प्रष्ट पारे । चालू आर्थिक वर्षको बजेट मार्फत सरकारले कुल जनसंख्याको ३३ प्रतिशत जनतामा बीमाको पहुँच पु¥याउने लक्ष्य राखेको छ । तर दाबी भुक्तानीमा देखिएको अन्यौलले उक्त लक्ष्यलाई समेत प्रभावित पार्न सक्ने उनको बुझाइ छ ।
सरकारलाई दायित्व बापतको रकम तत्काल निकासा गर्न बीमा समिति र कम्पनीहरूबाट पनि पटकपटक पहल भइरहेको जनाइएको छ । बीमितहरूले दाबी भुक्तानीका लागि ताकेता गरिरहेकाले भन्दै उनले कतिपय बीमितले त कम्पनीको शाखा कार्यालय नै बन्द गर्नेसम्मको धम्की दिन थालेको महासचिव क्षेत्रीले बताए ।
नेपालमा कोरोना संक्रमण बढ्दै गर्दा २०७७ वैशाख ७ गतेदेखि कोरोना बीमा पोलिसी शुरू गरिएको थियो । गतवर्षको असार मसान्तदेखि यो बीमा पोलिसीको विक्री बन्द भएको छ ।
