४३ लाख ४८ हजार नाघे स्थायी लेखा नम्बर लिने करदाता

काठमाडौं, २१ पुस । स्थायी लेखा नम्बर लिने करदाता संख्या बढ्दै गएको छ । चालू आर्थिक वर्षको पहिलो चार महिनामा स्थायी लेखा नम्बर लिने करदाता संख्या करिब साढे ४३ लाख पुगेको छ ।

अर्थ मन्त्रालयले सार्वजनिक गरेको तथ्यांक अनुसार कात्तिकसम्ममा स्थायी लेखा नम्बर लिने करदाताको कुल संख्या ४३ लाख ४८ हजार ९ सय ३७ पुगेको हो । यस अवधिमा दर्ता भएका कुल करदातामध्ये व्यक्तिगत स्थायी लेखा नम्बर लिने करदाता करदाता २६ लाख ५२ हजार ३ सय ७७ (६१ प्रतिशत), व्यावसायिक स्थायी लेखा नम्बर लिने १६ लाख ८४ हजार ४ सय ९७ (३८.७ प्रतिशत) र करकट्टि गर्ने निकायले लिएको स्थायी लेखा नम्बर १२ हजार ६३ (०.३ प्रतिशत) पुगेको छ ।

यसैगरी मूल्य अभिवृद्धि करमा दर्ता भएका करदाता ३ लाख ३ हजार ९ सय २६ र अन्तःशुल्कमा दर्ता हुने करदाताको संख्या २ लाख २३ हजार ४ सय २ पुगेको छ ।