नेपाली ऊलन सामग्रीको व्यवसाय बढ्दो, कोभिडपूर्वको अवस्थामा अझै फर्किन सकेन

टीकाराम गौतम

काठमाडौं १९ पुस । कोरोना संक्रमणको दर तुलनात्मक रूपमा कम भएसँगै नेपाली ऊलन सामग्रीको व्यापार बढेको छ । कोभिड संक्रमण उत्कर्षमा पुगेका बेला यस्ता सामग्रीको व्यवसायमा ठूलो ह्रास आएकोमा संक्रमण घट्दै गएपछि व्यवसाय सुधारोन्मुख रहेको व्यवसायीले बताएका छन् ।
ऊलन सामग्रीको बजार बढ्दै गए पनि यो व्यवसाय कोभिडपूर्वको अवस्थामा भने पुगिनसकेको सम्बद्ध व्यवसायीको भनाइ छ । काठमाडौंको भोटाहिटीस्थित नेपाल ऊल हाउसका अनुसार कोभिड मध्य समयको तुलनामा अहिले व्यापार २५–३० प्रतिशतले बढेको, तर कोभिडअघिको तुलनामा भने अझै ३०–४० प्रतिशत कम रहेको छ ।
सामान्य अवस्थाको तुलनामा जाडोयाममा ऊलबाट बनेका सामग्री बढी विक्री हुने गर्छ । ‘पछिल्लो समय ऊलबाट बनेका सामग्रीको व्यापार क्रमिक बढेको छ,’ नेपाल ऊल हाउसका सञ्चालक दिपेश तुलाधरले भने, ‘नेपाली ऊलन सामग्रीको डिजाइन एवं फिनिसिङ राम्रो भएकाले पनि गाह्रकको रुचिमा परेको छ ।’
सञ्चालक तुलाधरका अनुसार केही वर्ष अघिसम्म आयातित उलन सामग्रीको विक्री बढी हुने गरेकोमा पछिल्लो समय स्वदेशमै बनेका यस्तो वस्तुको बजार बढ्दै गएको छ । नेपालमा बन्ने ऊलन सामग्रीको अधिकांश कच्चापदार्थ (ऊल, धागो लगायत) भने चीन र भारतबाट आउने गरेको व्यवसायी बताउँछन् ।