लक्षित जनसंख्याको ६१ प्रतिशतले पाए कोभिडविरुद्धको पूर्ण मात्रा खोप
पूर्ण प्रसाद चौलागाईँ
काठमाडौं, ४ माघ । कोरोना भाइरसविरुद्धको खोप अभियान प्रगति लक्ष्य उन्मुख रहेको छ । सरकारले पुस मसान्तसम्ममा लक्षित जनसंख्याको दुई तिहाइलाई खोप दिने लक्ष्य लिएकोमा सो नजिक पुगेको हो ।
स्वास्थ्य तथा जनसंख्या मन्त्रालयका अनुसार हालसम्म ७९ दशमलव ५ प्रतिशतलाई पहिलो मात्रा र करिब ६१ प्रतिशतलाई पूर्ण मात्राको खोप लगाइएको छ । सरकारले लिएको खोपको लक्ष्यअनुसार नै सफलता मिलेको स्वास्थ्य तथा जनसंख्या मन्त्रालयले बताएको छ । अहिलेसम्मको तथ्यांक हेर्दा मनाङ, मुस्ताङ र कास्कीमा शतप्रतिशत खोप दिइएको छ । सरकारले पुस मसान्तभित्र लक्ष्य जनसंख्याको दुई तिहाइलाई खोप दिने लक्ष्य लिएको थियो । यस्तै आगामी चैत मसान्तसम्ममा १६ वर्षमाथिका सबैलाई खोप लगाउने लक्ष्य राखिएको छ ।
सरकारले १८ वर्षभन्दा माथिका एक करोड ९९ लाख २२ हजार १६४ जनालाई खोप लगाउने लक्ष्य लिएको थियो । पहिलो मात्रा एक करोड ५८ लाख ३७ हजार ६७१ जना र पूर्ण मात्रा एक लाख २१ हजार २७ लाख ८२९ जनाले लगाएका छन् । यसैगरी १२ देखि १७ वर्ष उमेर समूहका बालबालिकालाई मन्त्रालयले मोडर्ना र फाइजरको खोप लगाइरहेको छ । बालबालिकालाई अहिलेसम्म ५२ प्रतिशत पहिलो मात्रा र शून्य दशमलव १ प्रतिशत पूर्ण मात्राको खोप लगाइसकिएको स्वास्थ्य सेवा विभागको परिवार कल्याण महाशाखाका निर्देशक डा. विवेककुमार लालले जानकारी दिए ।
उनका अनुसार प्रदेशअनुसार बागमती र गण्डकीले लक्ष्यअनुसार खोप लगाइसकेका छन् । बागमती प्रदेशले पहिलो मात्रा ८२ प्रतिशत र पूर्ण मात्रा ७६ प्रतिशत तथा गण्डकी प्रदेशले पहिलो मात्रा ८३ प्रतिशत र पूर्ण मात्रा ८२ प्रतिशतले खोप लगाइसकेका छन् । यस्तै प्रदेश नं १ ले पहिलो मात्रा ७४ प्रतिशत र पूर्ण मात्रा ५४ प्रतिशत, प्रदेश नंं २ ले पहिलो मात्रा ५७ प्रतिशत र पूर्ण मात्रा ४८ प्रतिशत, लुम्बिनी प्रदेशले पहिलो मात्रा ७३ प्रतिशत र पूर्ण मात्रा ५७ प्रतिशत, कर्णाली प्रदेशले पहिलो मात्रा ५६ प्रतिशत र पूर्ण मात्रा ५१ प्रतिशत तथा सुदूरपश्चिम प्रदेशले पहिलो मात्रा ६४ प्रतिशत र पूर्ण मात्रा ५९ प्रतिशतले खोप लगाइसकेका छन् ।
