मुलुकको व्यापार घाटा १२ खर्ब ९० अर्ब ९६ करोड पुग्यो
काठमाडौं, २९ चैत । वस्तु आयातमा भएको उच्च वृद्धिका कारण व्यापार घाटा बढ्न गई अर्थतन्त्रमा दवाव सिर्जना भएको छ । चालु आर्थिक वर्षको चैत्र २५ सम्म १४ खर्ब ५० अर्ब ७१ करोड रुपैयाँ बराबरको बस्तु तथा सेवा आयात भएको छ ।
यस्तै, निर्यात एक खर्ब ५९ अर्ब ७६ करोड रुपैयाँ बराबर पुगेको छ । आयात र निर्यात अघिल्लो आर्थिक वर्षको सोहि अवधिको तुलनामा क्रमशः ३३.९ प्रतिशत र ७२.८ प्रतिशतले वृद्धि भएको छ । फलस्वरुप, व्यापार घाटा बढेर १२ खर्ब ९० अर्ब ९६ करोड पुगेको छ ।
विश्व बजारमा पेट्रोलियम पदार्थको मूल्यमा भएको वृद्धिले व्यापार घाटामा थप चाप पैदा गरेको अर्थ मन्त्रालयको भनाइ छ ।
