निर्वाचनको दिन वैशाख ३० गते नीजि तथा सार्वजनिक यातायात नचल्ने
काठमाडौं, २३ वैशाख । आगामी वैशाख ३० गते हुन गैरहेको स्थानीय तहको निर्वाचनको मतदान हुने दिन सार्वजनिक यातायातका साधन नचल्ने भएका छन । त्यस्तै प्रशासनको अनुमति पासबिनाका नीजि सवारी साधन पनि चलाउन नपाइने निर्वाचन आयोगले जनाएको छ ।
निर्वाचन आयोगले मतदानका दिन अनुमति पास विनाका सवारी साधन चलाउन नदिन भनेर सरकारलाई बिहीबार पत्र पठाएको हो । आयोगका अनुसार अपाङ्गता भएका मतदाताका हकमा सम्बन्धित मुख्य निर्वाचन अधिकृतबाट सवारी अनुमति लिएर एक घरका एक जनासहित मतदानस्थलमा जाने मापदण्ड तय गरिएको छ ।
सवारी साधन अनुमतिका लागि जिल्ला प्रशासन कार्यालयलाई अधिकार दिइएको मापदण्ड बनेको आयोगले जनाएको छ । तर कुटनीतिक नियोगका सवारी साधनले भने निर्वाचन आयोगको केन्द्रीय कार्यालयबाट अनुमति लिनुपर्नेछ । सञ्चारकर्मीलाई सूचना विभागको कार्डका आधारमा प्रमुख जिल्ला अधिकारीले अनुमतिपत्र जारी गर्ने व्यवस्था गरेको निर्वाचन आयोगले जनाएको छ ।
मतदानका दिन दैनिक उपभोग्य वस्तु बोक्ने र अत्यावश्यक सवारी साधन भने चल्न सक्ने निर्वाचन आयोगका प्रवक्ता शालिग्राम शर्मा पौडेलले जानकारी दिए । उनले विगतमा जस्तै मतदानका दिन यो पटक पनि यस्तो व्यवस्था गर्न लागेको बताए । एम्बुलेन्स दमकल चल्छन, दूध, तरकारीका गाडी चल्छन, पत्रकारहरुले अनुमति लिएर हिंड्न पाइन्छु, प्रवक्ता पौडेलले भने ।
त्यस्तै आयोगले भारत र चीनसँग जोडिएका सीमा नाका तीन दिन बन्द गर्न भनेर सरकारलाई पत्र पठाएको छ । वैशाख २७ गते राति १२ बजेदेखि अन्तराष्ट्रिय सीमाबाट हुने आवतजावत बन्द गर्न सरकारलाई पत्र पठाएर जानकारी गराएको प्रवक्ता शर्माले बताए ।
