सुधीर बस्नेतले नबिल बैंकको करिब ५० करोड ऋण तिरेनन्, सात दिनभित्र पैसा तिर्न प्राधिकरणको आदेश
काठमाडौं, १५ भदौ । कर्मचारी सञ्चय कोषले दुई-दुई पटक लिलामीमा राख्दासमेत बिक्री नभएको कोहिनुर हिल हाउजिङ प्रालिका मालिक सुधीर बस्नेतलाई नबिल बैंकको ऋण तिर्न डाकिएको छ ।
मंगलबार सात दिने सूचना जारी गर्दै ऋण असुली न्यायाधिकरणले नबिल बैंकको करिब ५० करोड रुपैयाँ तिर्न ताकेता गरेको हो ।
नबिल बैंकसहित कर्मचारी सञ्चय कोष लगायतसँग ऋण लिएर बस्नेतले कोहिनुर हिल हाउजिङ निर्माण गर्न खोजेका थिए । उनले ऋण चलाए पनि घर बनाउन सकेनन्। राष्ट्र बैंकले घरजग्गामा कडाइ गरेपछि बैना-बैनामा कारोबार गर्दै आएका बस्नेत चुर्लुम्म डुबेका थिए ।
ओरियन्टल सहकारीको मुद्दामा त उनी प्रहरी हिरासतमै पनि बसेका थिए ।
न्यायाधिकरणले २०७७ पुस ७ गते भएको निर्णय र गत वैशाख २३ गते भएको आदेश अनुसार ठहर भएको रकम भुक्तानी गर्न ताकेता गरेको हो ।
बस्नेतले ३२ करोड ४५ लाख ४८ हजार तिर्नु पर्ने ठहर भएको छ। यसबाहेक साँवा रकम १४ करोड ६ लाख पनि भुक्तानी गर्नु पर्ने ठहर भएको छ । यही पैसा तिर्नका लागि प्राधिकरणले ताकेता गरेको हो। पैसा नउठेपछि नबिलले प्राधिकरणमा मुद्दा हालेको थियो ।
