बालकुमारी झडपमा भएकाे दुई युवकको निधनप्रति गैरआवासीय नेपाली संघद्वारा दुःख व्यक्त
काठमाडाैं, १५ पुस । दक्षिण कोरियाको रोजगार अनुमति प्रणाली ‘ईपीएस’ अन्तर्गतका भाषा परीक्षार्थी र प्रहरीबीच ललितपुरको बालकुमारीमा शुक्रबार ९२९ डिसेम्बर २०२३० भएको झडपमा दुई युवकको निधन भएको प्रति गैरआवासीय नेपाली संघ गहिरो दुःख व्यक्त गरेकाे छ ।
वैदेशिक रोजगारीको लागि दक्षिण कोरिया जान आवश्यक परीक्षाको तयारी गर्दै गरेका २३ वर्षीय सुजन रावत र २२ वर्षीय वीरेन्द्र शाहले ज्यान गुमाएको उक्त घटनाले सबै गैरआवासीय नेपालीहरूलाई भावनात्मक चोट पुगेको जनाएकाे छ ।
‘नेपालमा पर्याप्त रूपमा रोजगारीका अवसर नहुँदा आफू र आफ्नो परिवारको उज्ज्वल भविष्यको लागि दैनिकरूपमा हजारौंको संख्यामा नेपाली युवा विदेशिन बाध्य भएका हुन् । यस्तो परिस्थिति र पृष्ठभूमिमा युवाप्रति सम्बन्धित निकायले देखाउने व्यवहार वास्तवमै संवेदनशील हुन जरुरी छ भन्ने कुरा ग्रहण गर्न संघ नेपाल सरकार समक्ष अनुरोध गर्दछ’, जारी विज्ञप्तिमा भनिएकाे छ ।
नेपालमै थप रोजगारी सृजना गर्न, वैदेशिक रोजगारीमा जाने युवाहरूलाई गन्तव्य मुलुकसम्म पुग्नको लागि स्पष्ट, सरल र सहज वातावरण बनाउन संघ नेपाल सरकारसँग सहकार्य गरी अघि बढ्न सधैँ तयार रहेको एनआरएनले जनाएकाे छ ।
साथै यस्ता अप्रिय घटना फेरि दोहोरिन नदिन र युवाको भावना तथा अपेक्षाप्रति संवेदनशील बन्न पनि आग्रह गरेकाे छ ।
