दोस्रो त्रैमासमा सूर्यज्योति लाइफ इन्स्योरेन्सको नाफा बढ्यो
काठमाडौं, २२ माघ । सूर्यज्योति लाइफ इन्स्योरेन्स कम्पनी लिमिटेडले चालू आर्थिक वर्षको दोस्रो त्रैमासिक वित्तीय विवरण सार्वजनिक गरेको छ । उक्त वित्तीय विवरण अनुसार कम्पनीको खुद नाफा गत आर्थिक वर्षको दोस्रो त्रैमासको तुलनामा चालू आर्थिक वर्षको सोही अवधिमा ६२ दशमलव ९३ प्रतिशत बढेको छ ।
कम्पनीले गत आर्थिक वर्षको सोही अवधिमा १४ करोड ५२ लाख रुपैयाँ नाफा कमाएको थियो भने चालू आर्थिक वर्षमा बढेर २३ करोड ६६ लाख पुगेको हो ।
त्यस्तै,गत आर्थिक वर्षमा कम्पनीको कुल आम्दानी ३ अर्ब ४४ करोड रुपैयाँ थियो भने चालू आर्थिक वर्षको ५ महिनाको अवधिमा ५ अर्ब ८६ करोड रुपैयाँ रहेको छ ।
कम्पनीले दोस्रो त्रैमाससम्म ४ अर्ब २८ करोड ३५ लाख रुपैयाँ कुल बीमाशुल्क आर्जन गरेको छ । अघिल्लो आर्थिक वर्षको दोस्रो त्रैमाससम्ममा कम्पनीले २ अर्ब ६८ करोड १७ लाख रुपैयाँ कुल बीमाशुल्क आर्जन गरेको थियो ।
चालू आर्थिक वर्षमा कम्पनीले ४ अर्ब १५ करोड ७१ लाख रुपैयाँ खुद बीमाशुल्क आर्जन गरेको छ । अघिल्लो आर्थिक वर्षको सोही अवधिसम्म कम्पनीले २ अर्ब ५४ करोड १२ लाख रुपैयाँ खुद बीमाशुल्क आर्जन गरेको थियो ।
दोस्रो त्रैमाससम्म कम्पनीको प्रतिशेयर आम्दानी १० रुपैयाँ ४१ पैसा रहेको छ भने मूल्य आम्दानी अनुपात ५१ दशमलव ८७ गुणा र प्रतिशेयर नेटवर्थ १६५ रुपैयाँ १५ पैसा रहेको छ ।
