महालेखापरीक्षकको कार्यालयको ६६औं वार्षिकोत्सव सम्पन्न, बढ्दो बेरुजुलाई गम्भिर रुपमा लिन सभामुखको आग्रह
काठमाडाैं, १५ असार । मुलुकका सार्वजनिक निकायहरूको लेखापरीक्षण गर्ने सर्वोच्च निकाय महालेखापरीक्षकको कार्यालयको ६६औं वार्षिकोत्सव सम्पन्न भएको छ । कार्यालयले शनिवार सरकारका उच्चपदस्थ पदाधिकारीहरूको उपस्थितिमा वार्षिकोत्सव विशेष समारोह सम्पन्न गरेको हाे ।
समारोहमा सभामुख देवराज घिमिरेले सरकारी बेरुजु बढ्दै जानु चिन्ताको विषय रहेको भन्दै यसलाई सार्वजनिक निकायका जिम्मेवार पदाधिकारीले गम्भीर रुपमा लिनुपर्ने बताएका छन् ।
बेरुजु हुनै नदिने र हालसम्म कायम बेरुजुको फर्छ्योटलाई तीव्रता दिन पर्याप्त जनशक्ति व्यवस्थापनसँगै सम्बन्धित निकायका प्रमुख तथा लेखा उत्तरदायी अधिकारीले जिम्मेवारी बोध गर्नुपर्ने उनको भनाइ छ ।
सभामुख घिमिरेले बेरुजु घटाउन महालेखापरीक्षक कार्यालयको प्रतिवेदनमार्फत दिइएका सुझाव कार्यान्वयन गरी आर्थिक अनुशासन पालना र जवाफदेहिता कायम गर्न आग्रह गरे ।
उनले संविधानले तोकेको जिम्मेवारी गम्भीरताका साथ पूरा महालेखापरीक्षकको कार्यालयलाई समेत आग्रह गरे ।
