अर्थ मन्त्रालयले गर्यो सहसचिवहरुको जिम्मेवारीमा व्यापक हेरफेर: भन्सारमा भट्टराई आउँदा आन्तरिक राजश्व विभागमा दाहाल
काठमाडाैं, १ फागुन । अर्थ मन्त्रालयले सहसचिवहरुको जिम्मेवारी हेरफेर गरेको छ । जस अनुसार भन्सार विभागको महानिर्देशकका महेश भट्टराईले जिम्मेवारी पाएका छन् । उनी यसअघि मन्त्रालयको प्रवक्ता तथा योजना अनुगमन एवं मूल्यांकन महाशाखाका प्रमुख थिए ।
त्यस्तै, मदन दाहाल आन्तरिक राजश्व विभागमा सरुवा भएपछि रिक्त प्रशासन महाशाखामा थानप्रसाद पंज्ञानीलाई पठाइएको छ । उनी यसअघि वित्तीय सङ्घीयता समन्वय महाशाखामा थिए ।
त्यस्तै, सार्वजनिक वित्त व्यवस्थापन तालिम केन्द्रका प्रमुख शोभाकान्त पौडेललाई आर्थिक नीति विश्लेषण महाशाखामा तानिएको छ । यसअघि आर्थिक नीति विश्लेषण महाशाखाका प्रमुख रहेका महेश आचार्यलाई सार्वजनिक वित्त व्यवस्थापन महाशाखाको जिम्मेवारी दिइएको छ ।
मकवानपुरका सीडीओबाट मन्त्रालयमा तानिएको तीर्थराज चिलुवाललाई वित्तीय क्षेत्र व्यवस्थापन तथा संस्थान समन्वय महाशाखाको जिम्मेवारी दिइएको छ । उता पार्वती अर्याललाई भन्सार जाँचपास पछीको परीक्षण कार्यालय प्रमुख भन्सार परीक्षण प्रशासक बनाइएको छ ।
यसअघि त्रिभुवन विमानस्थलको प्रमुख भन्सार प्रशासक रहेको महेश बराललाई वित्तीय सङ्घीयता समन्वय महाशाखाको जिम्मेवारी दिइएको छ । भन्सार विभागकी उपमहानिर्देशक यमुना प्रधानलाई महालेखा नियन्त्रण कार्यालयको सहमहालेखा नियन्त्रक बनाइएको छ ।
त्यस्तै, आन्तरिक राजश्व विभागका उपमहानिर्देशक गोपी कृष्ण कोइरालालाई सार्वजनिक ऋण व्यवस्थापन कार्यालयको प्रमुख बनाइएको छ । उता सार्वजनिक ऋण व्यवस्थापन कार्यालयका प्रमुख अमृत लम्साललाई भन्सार विभागको उपमहानिर्देशकको जिम्मेवारी दिइएको छ ।
