७ महिनामा २ खर्ब ८३ अर्ब रुपैयाँ कर्जा प्रवाह, कुन क्षेत्रमा कति ऋण लगानी भयो त ?
काठमाडौँ, ५ चैत्र । चालु आर्थिक वर्ष ०८१/८२ को ७ महिनामा बैंक तथा वित्तीय संस्थाबाट २ खर्ब ८३ अर्ब ४६ करोड कर्जा विस्तार भएको छ ।
केन्द्रीय बैंकको तथ्यांकअनुसार माघ महिनासम्ममा ५४ खर्ब ३९ अर्ब रुपैयाँ कर्जा प्रवाह भएको छ । असार मसान्तसम्म बैंक तथा वित्तीय संस्थाहरुले ५१ खर्ब ६७ अर्ब रुपैयाँ कर्जा प्रवाह गरेका थिए ।
बैंक तथा वित्तीय संस्थाहरुबाट निजी क्षेत्रमा जाने कर्जा ७ महिनामा कर्जा ५.२७ प्रतिशतले बढेको हो। यस अघि गत ७ महिनामा बैंक तथा वित्तीय संस्थाहरुबाट कर्जा लगानी ४.१ प्रतिशतले वृद्धि भएको थियो।
पहिलो ७ महिनामा १ खर्ब ९७ अर्ब २१ करोड रुपैयाँ कर्जा प्रवाह भएको थियो। वार्षिक विन्दुगत आधारमा बैंक तथा वित्तीय संस्थाहरुबाट निजी क्षेत्रतर्फ प्रवाहित कर्जा ७.३ प्रतिशतले बढेको छ।
कुन क्षेत्रमा कति ऋण लगानी भयो त?
निजी क्षेत्रतर्फ वाणिज्य बैंकहरुको कर्जा ५.९, विकास बैंकहरुको ३.१ र वित्त कम्पनीहरुको कर्जा प्रवाह ५.२ प्रतिशतले बढेको छ।
बैंक तथा वित्तीय संस्थाको लगानीमध्ये चालु सम्पत्ति (कृषि तथा गैरकृषिजन्य वस्तु) को सुरक्षणमा १४.४ प्रतिशत र घरजग्गा धितो सुरक्षणमा ६५.१ प्रतिशत ऋण दिइएको हो।
औद्योगिक उत्पादनतर्फ ९.५, निर्माणमा ९, यातायात, संचार तथा सार्वजनिक सेवामा ६.७, सेवा उद्योगमा ७, उपभोग्यतर्फ ५.९ र थोक तथा खुद्रा व्यापार क्षेत्रमा ४.४ प्रतिशतले कर्जा बढेको छ।
आवधिक कर्जा ३.६, सेयर धितो कर्जा २७.८, आयात कर्जा ६९.५, हायर पर्चेज कर्जा ४.५, नगद प्रवाह कर्जा ३.७ र रियल इस्टेट कर्जा (व्यक्तिगत आवासीय घर कर्जासमेत) ३.२ प्रतिशतले बढेको राष्ट्र बैंकले जनाएको छ।
चालु पुँजी कर्जा भने १२.४ प्रतिशतले घटेको छ ।
