गणतन्त्रवादी दलहरूलाई एक हप्ताको अल्टिमेटम, चैत २१ गतेबाट सशक्त जनआन्दोलन गर्ने घोषणा
काठमाडौँ, १४ चैत । राजसंस्थाको वकालत गरिरहेका राजावादीहरुले गणतन्त्रवादीहरुलाई एक हप्ताको अल्टिमेटम दिएका छन् ।
नवराज सुवेदी नेतृत्वको संयुक्त जनआन्दोलन समितिले गणतन्त्रवादी दलहरूलाई एक हप्ताको अल्टिमेटम दिएको हो । विहिबार आयोजित पत्रकार सम्मेलनमा समितिका संयोजक सुवेदीले २०४७ सालको संविधानमा टेकेर नवीन समझदारीमा आउन दलहरूलाई आह्वान गरे ।
आफूहरूको शान्तिपूर्ण आन्दोलनलाई एक हप्तासम्म बेवास्ता गरिएमा चैत २१ गतेबाट सशक्त जनआन्दोलनको घोषणा गर्ने समितिले बताएको छ ।
चैत १६ गते घोडेजात्रा भएकाले त्यस दिन कुनै पनि आन्दोलनका कार्यक्रम नगर्ने निर्णय समितिले लिएको छ । १७ गतेदेखि भने निरन्तर आन्दोलन हुने सुवेदीले बताए ।
