प्रतिनिधि सभाको अवरोध अन्त्य गर्न प्रयास तीव्र, सभामुख र विपक्षी नेताहरूबीच छलफल जारी

काठमाडाैं, २५ जेष्ठ । त्रिभुवन अन्तर्राष्ट्रिय विमानस्थल (TIA) मा भएको भिजिट भिसा काण्डको छानबिन र गृहमन्त्री रमेश लेखकको राजीनामाको मागसहित भएको प्रतिनिधि सभाको लगातार अवरोध अन्त्य गर्न उच्चस्तरीय संवादहरू तीव्र पारिएका छन्।

यसै सन्दर्भमा सभामुख देवराज घिमिरे सिंहदरबारमा नेपाली कांग्रेस, एमाले र माओवादी केन्द्रका प्रमुख सचेतकहरूसँग बैठक गरिरहेका छन्। बैठकमा तीन प्रमुख दलका प्रमुख सचेतकहरूसँग संसदको गतिरोध अन्त्य गर्ने उपायबारे छलफल भइरहेको छ।

यसैबीच प्रमुख प्रतिपक्षी दल नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आज दिउँसो १२ बजे नयाँ बानेश्वरस्थित संसद भवनमा विपक्षी दलहरूको बैठक बोलाएका छन्। बैठकमा संसद अवरोधबारे साझा रणनीति निर्माण गर्ने प्रयास गरिएको छ।

विपक्षी दलहरू त्रिभुवन अन्तर्राष्ट्रिय विमानस्थलमा भएको भिजिट भिसा काण्डमा गम्भीर अनियमितता भएको आरोप लगाउँदै छन्। उनीहरूले छानबिनका लागि संसदीय छानबिन समिति गठनको माग गर्दै आएका छन्। साथै, गृहमन्त्री रमेश लेखकको राजीनामा माग समेत उनीहरूको प्रमुख एजेन्डा हो। तर सत्तारूढ गठबन्धनले हालसम्म उक्त माग स्वीकार गर्ने संकेत दिएको छैन।

जेठ १३ गतेदेखि संसद अवरुद्ध छ। यद्यपि जेठ १५ गते बजेट प्रस्तुत गर्दा विपक्षी दलहरूले संसद अवरुद्ध नगरे पनि त्यसयता बजेटमाथिको छलफल अघि बढ्न सकेको छैन। संसदको नियमित कार्यसूचीमा प्रवेश गर्न नसक्दा बजेट बहस प्रभावित भएको छ।

शनिबार नेपाली कांग्रेसका सभापति शेरबहादुर देउवा र माओवादी केन्द्रका अध्यक्ष प्रचण्डबीच भएको भेटवार्तामा समेत संसद गतिरोध अन्त्यका उपायहरूबारे गहन छलफल भएको थियो। प्रचण्डले आज विपक्षी दलहरूको बैठकमा देउवासँग भएको संवादको विस्तृत जानकारी दिने तयारी गरेका छन्।