९५ प्रतिशत क्षेत्रमा रोपाई सम्पन्न, धान उत्पादन ५८ लाख नाघ्ने अनुमान
काठमाडौं, ३ भद्रौ । मुलुकको कुल धान खेतीयोग्य जमिन मध्ये ९५ प्रतिशतभन्दा बढी क्षेत्रमा रोपाई सम्पन्न भएको छ । कृषि तथा पशुपन्छी विकास मन्त्रालयका अनुसार साउन अन्तिम सम्म मुलुकभर १४ लाख ८१ हजार हेक्टरमा धान रोपाई सम्पन्न भएको छट । यो कुल धान खेतीयोग्य क्षेत्रमध्येको ९५ प्रतिशतभन्दा बढी हो ।
मौसम प्रतिकुल भएका कारण यस वर्ष धान रोपाई राम्रो भएको मन्त्रालयले जनाएको छ । रोपाईको क्षेत्र अझै बढ्ने अनुमान गरिएको छ ।गत वर्ष साउन २५ गतेसम्म ८४ प्रतिशत र साउन ३२ गतेसम्म ८९ प्रतिशत रोपाइ भएको थियो ।
मन्त्रालयले सार्वजनिक गरेको तथ्यांकअनुसार हालसम्म उच्च पहाडमा ९६ प्रतिशत, मध्य पहाडमा ९४ प्रतिशत र तराईमा ९६ प्रतिशत रोपाइ भइसकेको छ । तराईमा रोपाई योग्य क्षेत्रमा अझै पनि रोपाई भइरहेको छ।
गत वर्ष भन्दा यस वर्ष धान उत्पादन बढ्ने मन्त्रालयको अनुमान छ । करिब ५८ लाख मेट्रिक टन भन्दा बढी धान उत्पादन हुने र यो वर्ष धानकै कारण १.५ प्रतिशतले जीडीपी बढ्ने अनुमान गरिएको छ ।
