चाडपर्वलाई लक्षित गरि सार्वजनिक सवारीको रुट परमिट खुला, ३१ गते सम्म लिन सकिने
काठमाडौं, २४ असोज । सरकारले आजदेखि सार्वजनिक सवारी साधनलाई इजाजत पत्र (रुट परमिट) खुला गरेको छ ।
भौतिक पूर्वाधार तथा यातायात मन्त्रालय अन्तर्गतको यातायात व्यवस्था विभागले नेपालीहरूको चाड दशैं, तिहार र छठ नजिकिएसँगै काठमाडौं बाहिर जाने र आउने यात्रुहरुको सहजताका लागि भन्दै असोज ३१ गतेसम्मलाई रुट परमिट खुला गरेको हो ।
यातायात व्यवसायीहरुले पनि परमिट खुला भएसँगै चाडबाडको समयमा यात्रुलाई सुरक्षित गन्तव्यमा ल्याउन तथा लैजान सहज हुने विश्वास लिएका छन् ।
त्यस्तै, विभागले सो समयमा सामान बोकेर काठमाडौँ भित्रिने ठूला सवारी साधन सञ्चालनमा रोक लगाएको छ । सडकमा बढ्ने सवारी चापका कारण जाम हुन सक्ने सम्भावनालाई मध्यनजर गर्दै यस्तो निर्णय गरेको विभागले जनाएको छ ।
