नेपालमा भ्रष्टाचार घटेन, १८० देश मध्ये १२४ औं स्थानमा
काठमाडौं,१६ माघ । सरकारले भ्रष्टाचार निवारण प्रमुख कार्यभार रहेको बताउदै आएपनि देशमा भ्रष्टाचार नघटेको तथ्यांकले देखाएको छ । ट्रान्सपरेन्सी इन्टरनेशनलले जारी गरेको भ्रष्टाचार अवधारणा सूचकांक (सिपिआई) २०१८ मा नेपाल १ सय ८० देशमध्ये १ सय २४ औं स्थानमा रहेको छ ।
सन् २०१७ मा १ सय मा ३१ अंक पाएको नेपालले २०१८ मा पनि ३१ अंक नै पाएको छ । शून्य अंक अति भ्रष्टाचार र १ सय अंकले स्वच्छ मुलुकका रुपमा चित्रण गर्दछ ।
विश्व बैंक, वल्र्ड इकोनोमिक फोरम, ग्लोबल इनसाइट, बर्टेल्सम्यान फाउन्डेशन, वल्र्ड जस्टिस प्रोजेक्ट र भीडीइएमसमेत ६ वटा संस्थाद्वारा गरिएको सर्वेक्षणका आधारमा नेपाल १ सय ८० मुलुकमध्ये १ सय २४ औं स्थानमा परेको हो ।
यस वर्ष डेनमार्क सबैभन्दा कम भ्रष्टाचार हुने र सोमालिया सबैभन्दा बढी भ्रष्टाचार हुने मुलुकको रुपमा सूचीकृत भएको छ ।
दक्षिण एशियाली राष्ट्रहरुमा भुटान २५, भारत ७८, श्रीलङ्का ८९, पाकिस्तान ११७, मालदिभ्स १२४, बङ्गलादेश १४९ र अफगानिस्तान १७२औं स्थानमा रहेका छन् । छिमेकी मुलुक चीनले ३९ अङ्क प्राप्त गरी ८७ औं स्थानमा छ ।