सन् २०२० मा २० लाख पर्यटक भित्र्याउन एनआरएनएले प्रवद्र्धनात्मक कार्यक्रम गर्ने
काठमाडौं १५, फागुन । गैरआवासीय नेपाली संघ (एनआरएनए)ले सन् २०१९ लाई नेपाल प्रवद्र्धन वर्षका रुपमा मनाउने भएको छ । नेपाल भ्रमण वर्ष २०२० मा २० लाख पर्यटक नेपाल भित्र्याउने सरकारी लक्ष्य सफल बनाउन सन् २०१९ लाई नेपाल प्रवद्र्धन वर्षका रुपमा मनाउन लागेको जनाइएको छ ।
यस अन्तर्गत एनआरएनएले विश्वभर रहेका आफ्ना सदस्यहरुबाट कम्तीमा एक एक मित्र आफ्नो मुलुक पठाऊ, गौतम बुद्ध जन्मिए र अतिथि देवो भवः लगायतका क्याम्पेहरु चलाउने छ । भ्रमण वर्ष सफल बनाउनकै लागि एनआरएनएका अध्यक्ष भवन भट्टको अध्यक्षता र सह कोषाध्यक्ष सोमनाथ सापकोटाको संयोजकत्वमा २ सय १३ सदस्यीय मूल समिति गठन गरिएको छ । समितिको अगुवाईमा अन्य राष्ट्रिय समन्वय परिषद सम्मिलित उपसमिति गठनको तयारी भइरहेको छ । नेपाल बाहिर आफू रहेको मुलुकबाट संघको एक सदस्यले कम्तीमा एक पर्यटकलाई नेपाल भ्रमण गर्न प्रेरित गर्ने कार्यहरु प्रारम्भ भइसकेको अध्यक्ष भवन समेत भट्टले बताए । उनले भने–‘नेपालको आर्थिक विकास पर्यटन क्षेत्रबाट गर्न सम्भव छ । त्यसको लागि हामीले नेपाल भ्रमण वर्ष २०२० लाई आ–आफ्ने स्थानबाट प्रचार प्रसार गर्न जरुरी छ ।’
त्यस्तै नेपाल पर्यटन बोर्डका प्रमुख कार्यकारी अधिकृत दिपक राज जोशीले नेपाल सरकारले लिएको समृद्ध नेपाल, सुखी नेपाली नारालाई साकार पार्ने महत्वपूर्ण अवसर नेपाल भ्रमण वर्ष २०२० भएको बताए । उनले भने–‘समृद्ध नेपाल सुखी नेपाल सरकारी लक्ष्यलाई भ्रमण वर्षले साकार पार्न सक्छ । त्यसको लागि हामी सबै एक भएर लाग्नु पर्दछ । एनआरएनले थालेको यस अभियनामा पर्यटन बोर्डको तर्फबाट गर्नु पर्ने सहयोग हामी गर्ने छौं । हामी सबै मिलेर लाग्यौं भने २० लाख पर्यटन भित्र्याउने लक्ष्य सम्भव छ ।’
