रोजगार अनुमति प्रणाली (इपिएस) भाषा परीक्षाका लागि आवेदन खुला

काठमाडौं, ८ चैत । रोजगार अनुमति प्रणाली (इपिएस)अन्तर्गत आज देखि प्रथम चरणको कोरियाली भाषा परीक्षाका लागि आवेदन खुला भएको छ।  राति १२ बजे आवेदन खुल्ला गरिएपछि विहान ७ बजे सम्ममा मात्र १५ हजार बढीले फाराम भरेको इपिएस कोरिया शाखाका सूचना अधिकारी शोभाकर भण्डारीले जानकारी दिए।

शुक्रबारदेखि १७ गतेसम्म आवेदन दर्ता गर्न सकिने व्यवस्था गरिएको छ।   परीक्षा आवेदन फारम इपिएस कोरिया शाखाको वेबसाइटबाट भर्न सकिनेछ। आवेदन फाराम दर्ता गर्दा परीक्षार्थीले आफूले परीक्षा दिन चाहेको केन्द्र रोज्नु पर्ने इपिएस शाखाले जनाएको छ। पोखरा केन्द्रको हकमा पहिलो आउने १२ हजार मात्रले आवेदन फाराम भर्न सक्नेछन्।

फारम भर्दा ध्यान दिनुपर्ने कुरा

आवेदन दिनका लागि अठार वर्ष पूरा भई ३९ वर्ष ननाघेका हुनुपर्ने छ । त्यसैगरी फौजदारी अभियोगमा अदालतबाट सजाय नपाएको, गणतन्त्र कोरियामा गई गैरकानूनी रुपमा बसोबास गरी कोरियाबाट फिर्ता नपठाइएको, नेपाल सरकारले अन्य मुलुकमा जान रोक नलगाएका र कोरियामा ई–९-ई–१० भिषामा दुई कार्यकाल वा पाँच वर्षभन्दा बढी नबसेका व्यक्तिले आवेदन गर्न सक्ने इपिएस कोरिया शाखाले जनाएको छ।

आवेदकले फाराम भर्दा राहदानीमा फोटो भइएको रङ्गीन पृष्ठ स्क्यान गरी अपलोड गर्नुपर्ने छ। त्यसैगरी अनिवार्य रुपमा आफ्नो इमेल ठेगाना र मोबाइल नम्बर उल्लेख गर्नुपर्ने छ।  आवेदकले जुन दिनमा फाराम दर्ता गराउने हो सो दिनको अघिल्लो दिनका लागि नेपाल राष्ट्र बैंकले तोकेको विनिमय दरका हिसाबबाट हुन आउने नेपाली रुपैयाँ ग्लोबल आइएमई बैंक र आइएमई–पे तथा इ सेवामार्फत बुझाउन सकिने इपिएस शाखाले जनाएको छ।  कोरियाली भाषा परीक्षा आगामी जेठमा सञ्चालन हुनेछ। आगामी जेठ २५ र २६ गते काठमाडौं र पोखरा केन्द्रबाट परीक्षा सञ्चालन गरिनेछ। परीक्षाको विस्तृत विवरण आगामी जेठ १९ गते प्रकाशन गरिनेछ। 

Leave a Reply

Your email address will not be published. Required fields are marked *