५१ लाख टन धान उत्पादन, गत वर्षभन्दा एक लाख टन कम
काठमाडौं, पुस ८ । यस वर्ष धानको उत्पादन गत वर्षको भन्दा एक लाख मेट्रिक टन घटेर ५१ लाख मेट्रिक टन उत्पादन हुने कृषि विकास मन्त्रालयले जनाएको छ । देशको कुल गार्हस्थ उत्पादनमा झण्डै २० प्रतिशत योगदान रहेको धानबालीको कुल कृषि उत्पादनमा आधा योगदान रहेको छ । कुल गार्हस्थ उत्पादनमा कृषि क्षेत्रको योगदान करिब २९ प्रतिशत छ ।
धानको उत्पादन कम भएकाले चालु आर्थिक वर्षको आर्थिक वृद्धिदर केही खुम्चिने अनुमान गरिएको छ । कृषि विकास मन्त्रालयले चालु आर्थिक वर्षमा ५४ लाख टन धान उत्पादन हुने अनुमान गरेको थियो । धान रोपाईंको बेला लामो खडेरी पर्नु र तराईमा बाढीका कारण ठूलो क्षति पुगेपछि धान उत्पादन कम हुने अनुमान गरेको थियो । विश्व बैंकले बाढीका कारण धान बालीमा क्षति पुगेपछि आर्थिक वृद्धिदर १ प्रतिशत बिन्दूले खुम्चिने अनुमान सार्वजनिक गरेको थियो । चालु आर्थिक वर्षमा सरकारले ७.२ प्रतिशत आर्थिक वृद्धिदर हासिल गर्ने लक्ष्य राखेको छ । धान उत्पादन बढाउन सरकारले विशेष कार्यक्रमहरु सञ्चालन गरे पनि उन्नत बीउबीजन, मल र सिंचाईको अभावमा धान उत्पादन अपेक्षित रुपमा बढ्न सकेको छैन ।
गत वर्ष समयमा वर्षात् भएका कारण धानको उत्पादन त्यसभन्दा अघिल्लो वर्षको तुलनामा २१ प्रतिशतले बढेर ५२ लाख मेटन धान उत्पादन भएको थियो ।
