वित्तीय संस्थाको गैर बैंकिङ्ग सम्पति बढ्यो, सबैभन्दा बढी वाणिज्य बैंकहरुको

काठमाडौं, १५ भदौ । बैंक तथा वित्तीय संस्थामा गैर बैंकिङ्ग सम्पति बढ्दै गएको छ । गत आर्थिक बर्ष २०७५/७६ मा वित्तीय संस्थाको गैर बैंकिङ्ग सम्पति ६ अर्ब रुपैयाँ पुगेको छ । यो रकम अघिल्लो आवको तुलनामा १ अर्ब बढी हो । अघिल्लो आवमा वित्तीय संस्थामा ५ अर्ब ७१ करोड बराबरको गैर बैंकिङ्ग सम्पति थियो ।

तथ्याङ्क अनुसार अधिकांश वित्तीय संस्थाको गैरबैंकिङ्ग सम्पत्ति बढेको छ । सबैभन्दा धेरै वाणिज्य बैंकहरूको बढेको छ । वाणिज्य बैंकहरूको यस्तो सम्पत्ति ४ अर्ब ५५ करोड रुपैयाँ पुगेको छ । यो रकम अघिल्लो आवको तुलनामा ३४ प्रतिशतले बढी हो । विकास बैंकहरूको ६२ करोड पुगेको छ । यो रकम अघिल्लो आवको तुनलामा ५ दशमलव ६ प्रतिशतले बढी हो । वित्त कम्पनीहरूको भने ६ प्रतिशतले घटेर ५३ करोड ७० लाख रुपैयाँ पुगेको छ ।

बैंक तथा वित्तीय संस्थाहरुले धितो सकारेपछि गैर बैंकिङ्ग सम्पति बढेको हो । केन्द्रीय बैंकले गरेको व्यवस्था अनुसार बैंकहरूले १ देखि ३ महिनासम्म कर्जाको भाका नाघेमा सूक्ष्म निगरानीमा राख्नुपर्छ । ६ महिनासम्म भाका नाघेमा कमसल कर्जा, १ वर्षसम्म भाका नाघेमा शंकास्पद कर्जा र १ वर्षभन्दा बढी भाका नाघेमा खराब कर्जाका रूपमा वर्गीकरण गर्नुपर्ने व्यवस्था छ ।

भाका नाघेका कर्जामा बैकहरुले लिलामी गर्न पाउँछन् । जसलाई गैर बैंकिङ्ग सम्पति भनिन्छ ।
तथ्याङ्क अनुसार एनसीसी बैंकको सबैभन्दा बढी यस्तो सम्पति छ । बैंकको ८९ करोड रुपैयाँ बराबरको गैर बैंकिङ्ग सम्पति छ । प्रभु बैकको ४४ करोड, सनराईजको ३९ करोड, बंगलादेशको ३४ करोड, एनआईसी एशियाको २७ करोड, कृषि विकासको २५ करोड, सिभिलको २२ करोड र नेपाल बंैकको २१ करोड रुपैयाँ यस्तो सम्पति रहेको जनाईएको छ ।

Leave a Reply

Your email address will not be published. Required fields are marked *