चौमासिक प्रगति समीक्षामा असन्तुष्ट बने प्रधानमन्त्री, काम नगर्नेको ठेक्का रद्द गर्न निर्देशन
काठमाडौं, १० मंसीर । प्रधानमन्त्री केपी शर्मा ओलीले चालु आर्थिक वर्षको पहिलो चौमासिकको प्रगति सन्तोषजनक नभएको बताएका छन् । प्रधानमन्त्री कार्यालयमा सबै मन्त्रालयका मन्त्री र सचिवसँग पहिलो चौमासिक समीक्षा बैठकका क्रममा प्रधानमन्त्रीले विकास खर्च निराशाजनक रहेको बताए । पहिलो चार महिनामा चालु वर्षका लागि विनियोजित ४ खर्ब ८ अर्ब मध्ये ६ प्रतिशत मात्र विकास खर्च भएको छ ।
‘कम्तीमा पनि २० प्रतिशत खर्च हुनुपथ्र्यो,’ प्रधानमन्त्रीलाई उद्धृत गर्दै समीक्षा बैठकमा सहभागी एक सचिवले भने, ‘हाम्रो पुँजीगत खर्च १४ प्रतिशत कम भयो ।’ गत वर्ष कर्मचारी व्यवस्थापन र कानुन निर्माण लगायतका कामले पुँजीगत खर्चलाई गति दिन नसकिएको भनिएको वर्ष पनि पहिलो चौमासिकमा पुँजीगत खर्च अहिलेभन्दा बढी थियो । पुँजीगत खर्च कम हुनुमा पूर्व भौतिक पूर्वाधार तथा निर्माण मन्त्रीलाई कारण देखाइएको छ । महासेठले फाइल अल्झाउने, काम नगर्ने ठेकेदारलाई पनि बचाउ गरेको आरोप छ ।
प्रधानमन्त्री ओलीले त्यसैलाई लक्षित गर्दै काम नगर्नेको ठेक्का खोस्न निर्देशन दिएका छन् । ‘कसैले काम गर्दैन भने उसलाई निरन्तरता दिने होइन, अब ठेक्का रद्द गर्नुस्’ प्रधानमन्त्री ओलीले सम्बन्धित मन्त्रालयका मन्त्रीहरुलाई निर्देशन दिए । उनले नवनियुक्त मन्त्रीहरुसँग आगामी चार महिनामा सम्पन्न गर्ने कामको सूची र नयाँ सोच (भिजन) सहित आउन आग्रह गरेका छन् । पुराना मन्त्री र सचिवहरुसँग भने क्रमशः प्रगति समीक्षा र आवश्यक निर्देशन दिने बताइएको छ ।
