चीन सरकारको सहयोगमा बन्न लागेको टिमुरे सुख्खा बन्दरगाहको डिजाइन स्वीकृत
काठमाडौं, माघ ३ । नेपालले चीन सरकारको सहयोगमा निर्माण हुन लागेको सुख्खा बन्दरगाहको डिजाइन स्वीकृत गरेको छ । चीनको छेङ्दूमा सम्पन्न नेपाली र चिनियाँ अधिकारीहरु सम्मिलित उक्त बैठकमा सुख्खा बन्दरगाहमा आवश्यक अन्य पूर्वाधारहरु निर्माण गर्न चिचियाँ पक्ष सहमत भएपछि डिजाइन स्वीकृत गरिएको बताइएो छ । यो डिजाइन चीनको आर्किटेक्चरल रिकन्साइन्स एण्ड डिजाइन इन्स्टिच्युट, तिब्बतले तयार गरेको हो ।
वाणिज्य मन्त्रालय र चीन सरकारबीच आजभन्दा पाँच वर्षअघि रसुवा जिल्लाको टिमुरेमा सुख्खा बन्दरगाह निर्माण गर्ने समझदारी भएको थियो । उक्त समझदारी अनुसार २०७१ सालमा चिनियाँ पक्षले सम्भाव्यता अध्ययन सम्पन्न गरी परियोजना अघि बढाउन नेपाल इन्टरमोडल यातायात विकास समितिसँग गत वर्ष सम्झौता गरेको थियो । ८.५ हेक्टर क्षेत्रफलमा पर्ने उक्त बन्दरगामा ५ हेक्टर लाङटाङ राष्ट्रिय निकुञ्जको हो भने बाँकी सरकारले निजी जमिन अधिग्रहण गरेको हो । यो बन्दरगाहमा ३१५ फ्रेट भेहिकलका लागि पार्किङ एरिया, ५०० वर्ग मिटरको प्रशासनिक भवन, ७५० वर्ग मिटरको गोदाम घर र २,०८० वर्ग मिटरको वस्तु जाँचपाँसका लागि खुला सेड निर्माण हुनेछ । बाहिरी पर्खाल, खानेपानी सहित अन्य आवश्यक पूर्वाधार यहाँ निर्माण गरिने भएको छ ।
यसपछि विस्तृत परियोजना प्रतिवेदनका लागि करिब ३ महिना समय लाग्छ भने प्रतिवेदन तयार भएको एक महिनापछि निर्माण शुरु हुनेछ । छेङ्दूमा आयोजित बैठकमा नेपाल इन्टरमोडल यातायात विकास समितिका कार्यकारी निर्देशक लक्ष्मण बहादुर बस्नेत र डिजाइन निर्माण गर्ने कम्निीका तर्फबाट प्रमुख इन्जिनियर मेङ नाकिङले हस्ताक्षर गरेका छन् ।
