टुटल, पठाओ बन्द गर्न आग्रह, सञ्चालक भन्छन्–‘बन्द हैन नियमन गरियोस्’

काठमाडौं, २८ फागुन । मिटर ट्याक्सी व्यवसायीहरुको आन्दोलनपछि यातायात व्यवस्था विभागले राइड सेयरिङ प्लेटफर्ममार्फत् बुकिङ गरी प्रयोग गरिने सवारीसाधन टुटल, पठाओ बन्द गर्न आग्रह गरेको छ । विभागले सूचना जारी गरी निजी सवारीसाधनलाई आफूखुसी भाडा तोकेर यात्रु बोक्नु कानुनको बर्खिलाप भएको जनाएको छ ।

तर, टुटल र पठाओका सञ्चालकहरुले भने यो सेवाले प्रयोगकर्तालाई सहज भएको बताएका छन् । उनीहरुले सरकारलाई नीति ल्याएर निरन्तर रुपमा सेवा दिनलाई बाटो खुला गरिदिन अनुरोध गरेका छन् । विकासको सहयात्री प्रविधि भएकाले त्यसलाई नीति बनाएर आगाडि बढे आफूहरु सरकारको नीति अनुसार चल्ने उनीहरुको भनाई छ । टुटलका सञ्चालक शिक्षित भट्ट भन्छन्–‘प्रविधिलाई दवाएर राख्ने हैन् । बरु त्यसलाई त व्यवस्थापन गर्न आवश्यक छ । हामीले एउटा प्लेट फर्म दिने हो त्यसको व्यवस्थापन गर्ने जिम्मा सरकारको हो । सरकारले यसलाई व्यवस्थापन गर्न कानुन बनाओस् । हामी त्यही अनुरुप चल्न तयार छौं ।’

त्यस्तै नविनतम काममा अन्यौलताका कारण यस्ता वाधा आउँने गरेको भट्टको भनाई छ । उनी भन्छन्– ‘टुटलमा अहिले करिव ३ हजार राइडरहरु आवद्ध छन् । यहाँ आवद्ध हुनेहरु अफिसमा काम गर्न समय नभएकाहरु र विद्यार्थीहरु बढी छन् । यसले आफ्नो लागि खर्च जोहो गर्न सहज हुनुकासाथै यात्रुलाई सहज सेवा पनि उपलब्ध भएको छ ।’

त्यसैगरी विभागले कानुन विपरीत काम गरेमा यातायात व्यवस्था ऐन बमोजिम कारबाही गरिने बताएको छ । ‘विभिन्न प्रयोजनका लागि दर्ता भएका सवारी साधनहरु आफूखुसी भाडा तोकी सार्वजनिक सवारीका रुपमा प्रयोग गर्दा सवारी तथा यातायात व्यवस्था ऐन २०४९ का दफा १२ को उपदफा १ मा भएको‘कुनै एक प्रयोजनका निम्ति दर्ता भएको सवारी अन्य प्रयोजनका निम्ति प्रयोग गर्न पाइदैंन,’ विभागले भनेको छ ।

विभाग, मातहत निकाय तथा अन्य सम्बन्धित निकायबाट टुटल, पठाओ सञ्चालन भए, नभएकोकडाइका साथ अनुगमन गर्ने भन्दै विभागले निजी प्रयोजनका सवारीसाधनलाई भाडाका यात्रु बोक्ने काममा नलगाउन आग्रह गरेको हो ।
यसअघि रघुवीर महासेठ मन्त्री हुँदा पनि विभागले टुटल, पठाओमा रोक लगाएको थियो । यसको सर्वत्र विरोध भएपछि प्रधानमन्त्री केपी शर्मा ओलीले नै टुटल, पठाओ चलाउन दिन आग्रह गरेका थिए । वर्तमान भौतिक पूर्वाधार तथा यातायात मन्त्री वसन्त नेम्बाङले पनि टुटल, पठाओ चलाउन दिने बताएका थिए । यद्यपि नयाँ व्यवस्थापछि भने उनले कुनै सार्वजनिक अभिव्यक्ति दिएका छैनन् ।

गत साता पठाओका ट्याक्सीमाथि मिटर ट्याक्सी व्यवसायीले आक्रमण समेत गरेका थिए । छिमेकी भारतमा पनि ओला क्याबको प्रयोगले व्यापकता पाएपछि त्यहाँका ट्याक्सी व्यवसायीहरुले आन्दोलन गरेका थिए । नेपालमा टुटल, पठाओलाई इनोभेटिभ व्यवसाय मान्ने या नमान्ने भन्ने बहस जारी नै छ । यद्यपि यातायात व्यवस्था विभागले भने यसलाई रोक लगाउन पटक–पटक प्रयास गरिरहेको छ ।

 

 

Leave a Reply

Your email address will not be published. Required fields are marked *