उद्योग खुल्ने क्रम बढ्दै, हेटौंडा औद्योगिक क्षेत्रमा थप १५ उद्योग सञ्चालनमा

हेटौंडा, २८ वैशाख । शर्तसहित उद्योग व्यवसाय खुलाउने सरकारको निर्णयको प्रभाव औद्योगिक क्षेत्रहरूमा पनि परेको छ । जनशक्ति, कच्चापदार्थ, बजार व्यवस्थापन लगायतमा समय लाग्ने भन्दै व्यवसायीले तत्कालै सबै उद्योग पूर्ण क्षमतामा सञ्चालनमा ल्याउन चुनौती रहेको बताइरहे पनि उद्योग खुल्नै क्रम भने बढेको छ । लकडाउन जारी रहँदा यसअघि अत्यावश्यक वस्तु उत्पादन गर्ने १५ ओटा उद्योग मात्र सञ्चालनमा रहेको हेटौंडा औद्योगिक क्षेत्रमा हाल १५ ओटा थपिएको बताइएको छ ।
यससँगै हेटौंडा आद्योगिक क्षेत्रमा सञ्चालनमा आएका उद्योगको संख्या ३० पुगेको छ । हेटौंडा औद्योगिक क्षेत्र व्यवस्थापन कार्यालयका अनुसार बन्दाबन्दीको समयमा हाल सो संख्यामा उद्योग सञ्चालनमा आएका हुन् ।
अत्यावश्यक सामग्री उत्पादन गर्ने १५ र अन्य १० उद्योगले सामाजिक दूरी कायम राखेर सुरक्षित भएर उत्पादन गरिरहेको बताइएको छ । कच्चा पदार्थको अभावले उद्योग न्यून क्षमतामा सञ्चालन भइरहेको व्यवस्थापन कार्यालयका व्यवस्थापक राजेन्द्र कँडेलले जानकारी दिएका छन् ।
उनले भने, ‘हामीले उद्योगलाई सुरक्षा विधि अपनाएर सञ्चालन गर्न भनेका छौं तर कच्चा पदार्थ, बजार र ढुवानीलगायत समस्याका कारण सञ्चालित उद्योग पनि पूर्ण क्षमतामा सञ्चालन हुन सकेका छैनन् ।’
जनशक्तिको पनि अभाव रहेको व्यवस्थापक कँडेलको भनाइ छ । औद्योगिक क्षेत्रमा २५ प्रतिशत मात्र जनशक्ति मकवानपुरका रहेका र अन्य बाहिरका रहेकाले पनि उद्योग सञ्चालनमा कठिनाइ हुने उनले बताए ।
उनका अनुसार औद्योगिक क्षेत्रमा रहेका १४९ उद्योगमध्ये १०८ मात्र चालू अवस्थामा रहेका छन् । यीमध्ये पनि १५ मात्र अत्यावश्यक सामग्री उत्पादन गर्ने कारणले बन्द नभएका र हाल थप १५ उद्योग सञ्चालनमा आएका हुन् ।

Leave a Reply

Your email address will not be published. Required fields are marked *