अविरल वर्षाले देशभर बाढी र पहिरो : कयौ बस्ती डुबानमा, विभिन्न राजमार्गमा ठूलो क्षति
काठमाडौं, ६ साउन । अविरल वर्षाका कारण आएको बाढी पहिरोले देशभरका विभिन्न राजमार्ग, सहायक राजमार्ग र ग्रामीण सडकहरुमा ठूलो क्षति पुगेको छ। देशमा विभिन्न स्थानमा पहिरो खस्नुका साथै नदीले कटान गर्ने क्रम बाक्लिएको छ ।
मौसम विभागले अझै केही दिन वर्षा हुने अनुमान गरेको छ। त्यसले गर्दा अत्यावश्यक काममाबाहेक राजमार्ग भएर सडकमा यात्रा नगर्न सडक विभागले आग्रह गरेको छ । विभागका अनुसार अवरुद्ध राजमार्गहरु खुलाने काम भइरहेको छ ।
काठमाडौं प्रवेश गर्ने मुख्य सडक पृथ्वी राजमार्गको मौवाखोलाको पुल बाढीका कारण भत्किएपछि यातायात पूर्णरुपमा बन्द भएको छ। उत्ता, मुग्लिन–नारायणगढ सडक खण्ड पनि पहिरोका कारण अवरुद्ध छ । त्यस्तै, अछामको साँफेबगरबाट बाजुराको मार्तडी जाने सडकमा पनि पहिरोले क्षति पुर्याएको छ भने सुर्खेत(जुम्ला सडक अवरुद्ध भएको छ। कतिपय स्थानमा पुल बगाएपछि बेली ब्रिज हाल्ने काम पनि विभागले गरिरहेको छ।
विभिन्न ठाउँमा पहिरो जाँदा प्रदेश ५ मा सिद्धार्थ राजमार्ग र पूर्व–पश्चिम राजमार्ग पनि अवरुद्ध छ ।
सप्तकोसीको पानीले खतराको तह पार गर्यो
सप्तकोसी नदीमा पानीको सतहले खतराको तह पार गरेको छ। पानीको बहाव उच्च भएपछि कोसी ब्यारेजका ५६ मध्ये ४८ वटा ढोका खोलिएका छन्।
