सुनको मूल्य निरन्तर बढ्दै, आइतवार प्रतितोला रू. ९६ हजार ३००

काठमाडौं, ११ साउन । पछिल्ल्ला दिनहरूमा सुनको मूल्यले एकपछि अर्को रेकर्ड राख्ने क्रम जारी छ । गत सोमवारदेखि उच्च अंकले उकालो चढ्न थालेको पहेँलो धातुको मूल्य आज आइतवार अघिल्लो दिनको तुलनामा छापावाल ५ सय रुपैयाँ बढेर प्रतितोला ९६ हजार ३०० रुपैयाँ पुगेको छ ।
यस दिन तेजावी सुनको मूल्य पनि अघिल्लो दिनको तुलनामा ४९५ रुपैयाँ बढेर प्रतितोला ९५ हजार ९६० पुगेको छ । आइतवार चाँदीको मूल्य भने झीनो अंकले बढेको छ । यस अघिल्लो दिनको तुलनामा यस दिन चाँदीको मूल्य प्रतितोला ५ रुपैयाँ बढेर ११ सय ५५ रुपैयाँ पुगेको छ ।
अन्तरराष्ट्रिय बजारमै सुनको मूल्य बढेकाले त्यसको प्रभाव नेपालका सुनचाँदी बजारमा देखिएको हो । अमेरिका–चीन व्यापार युद्ध लगायत कारण सुनको मूल्यमा बढोत्तरी भएको र आगामी दिनमा मूल्य अझै माथि जाने अनुमान गरिएको छ ।