सुनको मूल्यमा दिनदिनै कीर्तिमानी, जानकार भन्छन् ‘छिट्टै एक लाख नाघ्छ’
काठमाडौं, १२ साउन । स्थानीय बजारमा सुनको मूल्य तोलाको ९७ हजार ५ सय रुपैयाँ पुगेको छ । हिजो तोलाको ९६ हजार ३ सयमा कारोबार भएको सुन आज एकै दिन तोलाको १२ सय रुपैयाँले बढेको नेपाल सुनचाँदी व्यवसायी महासंघले जनाएको छ ।
नेपाली बजारमा यो मूल्य हालसम्मकै उच्च हो । अन्तर्राष्ट्रिय बजारमा भइरहेको मूल्यवृद्धिसँगै यहाँ पनि मूल्यले दिनहुँ ऐतिहासिक रेकर्ड बनाएको हो । पछिल्लो समय नेपाल बजारमा सुनको मूल्य निरन्तर बृद्धि देखिएको हो ।
पछिल्लो एक सातामा मात्रै सुनको मूल्य ५ हजार २ सय रुपैयाँले बढेको छ । आगामी दिनमा मूल्य अझै माथि जाने अनुमान गरिएको छ । यही महिना अन्तर्राष्ट्रिय बजारमा प्रतिऔस २ हजार डलर पुग्ने अनुमान गरिएको छ। अन्तर्राष्ट्रिय बजारमा २ हजार डलर पुग्दा यहाँ प्रतितोला करिब १ लाख रुपैयाँसम्म पुग्ने महासंघका पूर्व अध्यक्ष मणिरत्न शाक्यले बताए ।
त्यती मात्र नभई केही समयपछि अन्तर्राष्ट्रिय बजारमा २२ सय डलर पुग्ने प्रक्षेपण गरिएको छ । सो समय नेपाली बजारमा सुन तोलाको १ लाख २५ हजार रुपैयाँ हाराहारीमा पुग्ने छ।
मूल्य बढ्नुका कारण
विश्वव्यापी रुपमै सुनलाई सुरक्षित लगानी मानिन्छ । यसका साथै सुनलाई नगद जस्तै तरल बस्तुको रुपमा समेत लिने गरिन्छ । अन्तर्राष्ट्रिय बजारमा देखिने अस्थिरता, आर्थिक संकट र युद्धका बेला लगानीकर्ता सुरक्षित हुन खोज्छन् । त्यो समयमा अन्य क्षेत्रको लगानी झिकेर पनि सुनमा बढाउँछन् । अहिले सुनको भाउ बढ्नुको कारण पनि यही हो ।
कोभिड–१९ को संकट नै लगानीकर्ताहरु अन्यौलमा रहेको शाक्यले बताए । त्यस्तै हङकङका कारण चीन र अमेरिकाबीच उत्पन्न तनाव पनि सुनको मूल्य बढ्नुको अर्को कारण रहेको उनले बताए ।
