सामान्य अंकले घटेको शेयर बजारमा कारोबार रकम भने ३१ करोड घट्यो
काठमाडौं, २२ साउन । साताको अन्तिम कारोबार दिन बिहीबार (आज) नेप्से परिसूचक सामान्य अंक घटेर बन्द भएको छ । परिसूचनक घटेसँगै शेयर कारोबार रकम पनि घटेको छ । गत कारोबार दिन (बुधबार) १ अर्ब २३ करोड रुपैयाँभन्दा बढीको शेयर कारोबार भएकोमा आज शेयर कारोबार रकममा ३१ करोड रुपैयाँ कमी आएको हो । नेप्से परिसूचक १.२९ अंक घटेर १३८१.३७ विन्दुमा झरेको छ ।
१८६ कम्पनीले २० हजार ५४८ पटकको कारोबारमा ३२ लाख ३७ हजार २३० कित्ता शेयर ९१ करोड ८१ लाख रुपैयाँमा खरिद विक्री भएको छ । आज गुँरास लघुवित्त वित्तीय संस्था लिमिटेडका लगानीकर्ताले सर्वाधिक कमाएका छन् । यो कम्पनीको प्रतिशेयर मूल्य १० प्रतिशतले वृद्धि भई ९२४ रुपैयाँ कायम भएको छ । त्यस्तै महिला सहयात्रा माइक्रोफाइनान्स वित्तीय संस्था लिमिटेडका लगानीकर्ताहरुले सबैभन्दा बढी गुमाएका छन् । यो कम्पनीको प्रतिशेयर मूल्य ६.०६ प्रतिशतले घटेर अन्तिम शेयर मूल्य ६६७ रुपैयाँ कायम भएको छ ।
सबैभन्दा बढी शेयर खरिद बिक्री भने नेपाल पुनर्बीमा कम्पनी लिमिटेडको भएको छ । यो कम्पनीको ११ करोड ७८ लाख रुपैयाँभन्दा बढीको शेयर खरिद बिक्री भएको छ भने अन्तिम शेयर मूल्य ५७५ रुपैयाँ कायम भएको छ ।
बिहीबार कारोबारमा आएका १२ समूहमध्ये ६ समूहको परिसूचकमा वृद्धि भएको छ भने बाँकी समूहको परिसूचकमा भने कमी आएको छ । सर्वाधिक परिसूचक वृद्धि होटल समूहको २.२७ प्रतिशत भएको छ ।
