मनसुन शुरू भएयता हालसम्म बाढीपहिरोबाट मुलुकभर २२६ स्थानमा सडक तथा पुलमा क्षति

काठमाडौं, ३१ भदौ । यस वर्ष मनसुन शुरू भएयता हालसम्म मुलुकभर २२६ स्थानमा सडक तथा पुलमा क्षति भएको पाइएको छ । असार अन्तिम सातादेखि हालसम्म देशका उक्त स्थानमा सडक तथा पुलमा क्षति पुगेको सडक विभागले बताएको । यस्तै देशभर अहिले विभिन्न ११ स्थानका सडक अवरुद्ध रहेको र १०० भन्दा बढी स्थानमा एकतर्फी तथा आंशिक रूपमा यातायात सञ्चालनमा आएको विभागको तथ्यांक छ ।
बाढीपहिरोले सबैभन्दा बढी क्षति अरनिको राजमार्गका विभिन्न स्थानमा भएको विभागले बताएको छ । उक्त राजमार्गपछि साँफे–मार्तडी र उत्तरी–दक्षिण करिडोरको बेनी–जोमसोम खण्डमा धेरै क्षति पुगेको जानकारी विभागका प्रवक्ता शिवहरि सापकोटाले दिएका छन् । विभागका अनुसार अरनिको राजमार्गमा पहिरो, खोलाले क्षति पुगेका पुल र सडकहरू आंशिक र एकतर्फी रूपमा मात्रै सञ्चालनमा छन् । यस राजमार्गमा विभिन्न १५ स्थानमा सडक तथा पुलमा क्षति पुगेको छ ।
विभागका अनुसार बाढीपहिरोका कारण क्षतिग्रस्त सडक र पुलहरू बनाउन रू. ३ अर्बभन्दा बढी लगानी आवश्यक हुने प्रारम्भिक अनुमान गरिएको छ । राजमार्ग तथा अन्य सडक खण्डका धेरै स्थानका सडक, बेलिब्रिज, बन्दै गरेका पुल भत्किँदा ठूलो क्षति भएकाले मर्मत सम्भारका लागि धेरै लगानी लाग्ने देखिएको विभागको भनाइ छ । क्षतिग्रस्त सडक तथा पुल निर्माण÷मर्मतसम्भारका लागि विभागले भौतिक पूर्वाधार तथा यातायात मन्त्रालयमार्फत अर्थ मन्त्रालयसँग बजेट माग गरेको र त्यसपछि कार्यालयहरूमा अख्तियारी दिने बताएको छ ।