आज मन्त्रिपरिषद् विस्तार हुँदै, संघीय समाजवादी फोरम पनि सरकारमा सामेल हुने

काठमाडौं, १४ फागुन । प्रधानमन्त्री केपी शर्मा ओलीले आज संघीय समाजवादी फोरमलाई समेत समावेश गरी मन्त्रिपरिषद् विस्तारको तयारी गरेका छन् । सरकारमा सहभागी हुने मन्त्रीहरुको नाम पनि टुंगो लागेको बताइएको छ । एमाले र माओवादी दुवै दलले मन्त्री बन्नेहरुको सूची टुंगो लगाउन अध्यक्ष केपी शर्मा ओली र प्रचण्डलाई जिम्मा दिएका थिए । फोरम पनि सरकारमा सहभागी हुने भएपछि उपेन्द्र यादव ओली सरकारको परराष्ट्र मन्त्री बन्ने चर्चा छ । फोरमलाई परराष्ट्र सहित, संघीय मामला तथा स्थानीय विकास मन्त्रालय र प्रतिनिधिसभामा उपसभामुख दिइने भएको छ ।
त्यस्तै एमालेका तर्फबाट मन्त्री बन्नेहरुमा महासचिव इश्वर पोखरले, सचिव प्रदीप ज्ञवाली, दोलखाका प्रतिनिधिसभा सदस्य पार्वत गुरुङ, प्रतिनिधिसभा सदस्य प्रेम आले र रविन्द्र अधिकारीको चर्चा छ । ईश्वर पोखरेललाई अर्थ तथा योजना र ज्ञवालीलाई भौतिक योजना तथा निर्माण र गुरुङलाई पर्यटन मन्त्रालय दिइने भएको छ । ओलीले अर्थशास्त्री डा. युवराज खतिवडालाई पूर्ण कार्यभार सहित अर्थराज्यमन्त्री बनाउन खोजेको भएपनि सर्वोच्च अदालतले ओली सरकारले सिफारिश गरेका तीन राष्ट्रियसभा सदस्यलाई सपथ नखुवाउन आइतबार अन्तरिम आदेश जारी गरेको छ । पछि सरकारका पक्षमा फैसला भए खतिवडालाई राज्यमन्त्रीको रुपमा अर्थमा ल्याइने बताइएको छ ।
मओवादी नेता कृष्णबहादुर महरा प्रतिनिधिसभाको सभामुख बन्ने भएका छन् भने उक्त पदमा गिरिराजमणी पोखरेलले पनि चाहना राखेका छन् । सरकारमा रामबहादुर थापा, वर्षमान पुन, मातृका यादव, शक्ति बहादुर बस्नेत, देवेन्द्र पौडेल, बिना मगर र सुदन किराँती पठाइने भएको छ । माओवादीमा भने मन्त्री बनाउनेहरुको सूचीलाई अन्तिम रुप दिन अझै गृहकार्य चलिरहेको छ । प्रभु साह, चन्द्र प्रकाश खनाल (बलदेव), देवेन्द्र पौडेल (सुनील) ले समेत सरकारमा सहभागी हुने इच्छा देखाएपछि प्रचण्ड थप अप्ठेरोमा परेका हुन् ।
त्यसो त एमालेका अन्य काकांक्षीहरु विष्णु पौडेल, योगेश भट्टराई, सुरेन्द्र पाण्डे तथा पद्मा अर्याल लगायतलाई समायोजन गर्न पनि ओलीका लागि ठूलै चुनौती रहेको बताइन्छ । योगेश भट्टराईले सूचना तथा सञ्चार र सुरेन्द्र पाण्डेले अर्थ मन्त्री बन्ने चाहना राखेका छन् । स्रोतहरुका अनुसार, पौडेल या पाण्डेलाई रक्षा मन्त्री बनाएर भट्टराईलाई सूचना तथा सञ्चारमन्त्रीमा नियुक्त गर्ने तयारी भइरहेको छ ।

Leave a Reply

Your email address will not be published. Required fields are marked *