लुक्ला विमानस्थललाई बुटिक एअरपोर्टको रूपमा विकास गरिन्छ : पर्यटनमन्त्री भट्टराई
काठमाडौं, ३० कात्तिक । संस्कृति पर्यटन तथा नागरिक उड्डयनमन्त्री योगेश भट्टराईले सोलुखुम्बुको लुक्ला एयरपोर्टलाई बुटिक एयरपोर्टको रुपमा विकास गरिने बताएका छन् । आइतबार सोलुखुम्बुको खुम्बु पासाङल्यामु गाउँपालिकामा पर्यटन विभागद्वारा निर्मित पर्यटन सूचना केन्द्रको भवन उद्घाटन तथा हस्तान्तरण कार्यक्रममा मन्त्री भट्टराईले एयरपोर्टमा शेर्पा समुदायको संस्कृति झल्कने गरी सजावट गरिने बताएका हुन्।
उनले त्यसको लागि नेपाल नागरिक उडड्यन प्राधिकरणलाई लागत तयार गर्न निर्देशन दिएका छन् । मन्त्री भट्टराईले एयरपोर्ट सञ्चालन स्थानीय तहलाई दिन सकिने बताउँदै त्यसको लागि आवश्यक नीतिगत प्रबन्ध मन्त्रालयले तयार गर्ने र आधारभूत सेवा नेपाल नागरिक उडड्यन प्राधिकरणले गर्ने बताएका छन्। उनले एयरपोर्ट सुरक्षामा दिनुपर्ने बताउँदै एक्स–रे मेसिन, लगेज बेल्टको प्रस्ताव पठाएमा बजेटको ब्यवस्था गरिदिने पनि भट्टराइले बताएका छन्।
मन्त्री भट्टराईले लुक्ला हिमालय क्षेत्र जाने मुख्यद्वार भएको उल्लेख गर्दै राष्ट्रिय निकुञ्ज, हिमाल, जैविक विविधताले महत्त्वपूर्ण क्षेत्र भएकोले सुचना केन्द्र आवश्यक रहेको बताए। उनले सगरमाथा क्षेत्र, शेर्पा संस्कृति जानकारी, ट्रेकिङ रुट तथा पर्यटकिय क्षेत्रको सबै जानकारी पर्यटन सूचना केन्द्रमा प्राप्त हुने विश्वास व्यक्त गरेका छन्।
उक्त सूचना केन्द्र तीन करोड ६३ लाखको लागतमा निर्माण सम्पन्न भएको हो।
