कोभिड विरुद्धको खोप प्राप्तिमा सरकारको प्रयास, विभिन्न मुलुकलाई पठाइयो कूटनीतिक नोट

काठमाडौं, १० मंसिर । विज्ञहरूले विश्वव्यापी महामारीको रूपमा व्याप्त कोरोना भाइरस विरुद्ध लड्न खोप (भ्याक्सिन) नै अन्तिम र भरपर्दो विकल्प हुने बताइरहँदा यसको प्राप्तिमा सरकारले पनि प्रयास थालेको छ । जस अनुसार कोभिड–१९ विरुद्धको खोप प्राप्तिका लागि तेस्रो चरणको खोप परीक्षण गरिरहेका राष्ट्रलाई सरकारले कूटनीतिक नोट पठाएको छ । कोरोनाविरुद्ध तेस्रो चरणको खोप परीक्षणमा रहेका भारत, चीन, अमेरिका, बेलायत, जर्मनी, रुस र अष्टे«लियालगायत मुलुकलाई कूटनीतिक नोट पठाइसकिएको स्वास्थ्य तथा जनसंख्यामन्त्री भानुभक्त ढकालले जानकारी दिएको राससमा उल्लेख छ ।
केही ढिलो भए पनि कुल जनसंख्याको २० प्रतिशतलाई खोप प्राप्त गर्ने सुनिश्चितता भइसकेको स्वास्थ्य मन्त्रालयका प्रवक्ता डा. जागेश्वर गौतमले जानकारी दिएका छन् । तेस्रो चरणमा रहेकामध्ये कुन खोप खोपको प्रभाव, मूल्य र आउने सुनिश्चितता अझै यकिन भइसकेको छैन ।
यस्तै नेपालमा उक्त खोप प्राप्त भइसकेपछि सबैभन्दा पहिला कसलाई दिने भनी प्राथमिकता निर्धारण गर्नुपर्ने छ । तथापि स्वास्थ्यकर्मी, अग्रपंक्तिमा रहेर काम गर्ने र ५५ वर्ष उमेर समूह माथिलाई प्राथमिकता दिनुपर्ने एक किसिमको सुझाव प्राप्त भएको बताइएको छ । सम्भावना, प्रभावकारी र मुलुकको क्षमताका आधारमा ती खोपको छनोट हुने स्वास्थ्य मन्त्रालयले जानकारी दिएको छ ।
राज्यको स्रोत र सामथ्र्यका आधारमा कोरोनाबाट उत्पन्न समस्या समाधानका लागि सरकारले युद्धस्तरमा काम गरिरहेको स्वास्थमन्त्री ढकालको भनाइ छ ।
कोरोना संक्रमणबाट मुलुकमा हालसम्म १ हजार ३६२ जनाको मृत्यु भइसकेको छ भने २ लाख २४ हजार ७८ जना संक्रमित भइसकेका छन् । यस्तै हाल सक्रिय संक्रमितको संख्या १७ हजार ८५९ छ ।